અમદાવાદ: SOGની કાર્યવાહી, ડુપ્લીકેટ ગોલ્ડ ફ્લેક સિગારેટનો મોટો જથ્થો ઝડપાયો

અમદાવાદ શહેર SOG (સ્પેશિયલ ઓપરેશન્સ ગ્રુપ) ની ટીમે કોપીરાઈટ એક્ટના ભંગ બદલ મણિનગર અને કાલુપુર વિસ્તારમાં મોટી કાર્યવાહી કરી છે. આ કાર્યવાહી દરમિયાન, આરોપી સોભરાજ જેઠાનંદ કેવલાનીની દુકાનોમાંથી આઇ.ટી.સી. કંપનીના નામે વેચાતી ડુપ્લીકેટ ગોલ્ડ ફ્લેક સિગારેટનો મોટો જથ્થો ઝડપી પાડવામાં આવ્યો છે.

મણિનગરના સિંધી માર્કેટ અને કાલુપુરના પાન માર્કેટમાં આવેલી આરોપીની દુકાનો પર SOG દ્વારા દરોડા પાડવામાં આવ્યા હતા. આ દરોડા દરમિયાન, કુલ 6900 નંગ નકલી સિગારેટના પેકેટો કબજે કરવામાં આવ્યા છે. જપ્ત કરાયેલા આ નકલી સિગારેટના જથ્થાની કુલ અંદાજિત કિંમત રૂપિયા 8.62 લાખ રૂપિયા આંકવામાં આવી છે.

આરોપી સોભરાજ જેઠાનંદ કેવલાની દ્વારા આઇ.ટી.સી. કંપનીની ગોલ્ડ ફ્લેક સિગારેટની નકલ કરીને તેનું વેચાણ કરવામાં આવતું હતું. SOGની આ કાર્યવાહીથી નકલી સિગારેટના વેચાણના મોટા રેકેટનો પર્દાફાશ થયો છે. પોલીસે વધુ તપાસ હાથ ધરી છે.