રખિયાલમાં ભૂલા પડેલા બાળકને 'એચ' ટ્રાફિક પોલીસે પરિવાર સાથે સુરક્ષિત મિલાવ્યો

અમદાવાદ ટ્રાફિક પોલીસ માત્ર માર્ગ સલામતી જ નહીં, પરંતુ માનવીય સંવેદનાઓને સર્વોપરી રાખીને નાગરિકોની સેવા માટે સતત કાર્યરત છે. રખિયાલ વિસ્તારમાં 'એચ' ટ્રાફિક પોલીસની સતર્કતા અને પ્રેમપૂર્વકના પ્રયાસોથી એક ભૂલો પડેલો માસૂમ બાળક તેના પરિવાર સાથે સુરક્ષિત રીતે પુન: મિલી શક્યો છે.

રખિયાલ સ્થિત કલંદરી મસ્જિદ નજીક 'એચ' ટ્રાફિક પોલીસના નિયમિત પેટ્રોલિંગ દરમિયાન એક નાનો બાળક એકલો અને ગભરાયેલી હાલતમાં મળી આવ્યો હતો. પોલીસ અધિકારીઓએ તાત્કાલિક પરિસ્થિતિની ગંભીરતા સમજીને બાળકને પ્રેમ અને સંવેદના સાથે સાંત્વના આપી.

પોલીસ અધિકારીઓએ બાળક સાથે ધીરજપૂર્વક વાતચીત કરી અને સ્થાનિક નેટવર્કની મદદથી તેના ઘરનું સરનામું શોધવાનો પ્રયાસ કર્યો. સફળતાપૂર્વક સરનામું ટ્રેસ કર્યા બાદ, બાળકને સુરક્ષિત રીતે તેના પરિવારજનોને સોંપવામાં આવ્યો, જેનાથી પરિવારમાં ખુશીની લહેર છવાઈ ગઈ.