અમરેલીના ધારી તાલુકા પંચાયત ખાતે સઘન સફાઈ ઝુંબેશ અને વૃક્ષારોપણ કાર્યક્રમ યોજાયો: ધારાસભ્ય જે.વી. કાકડીયા રહ્યા ઉપસ્થિત

અમરેલી જિલ્લાના ધારી તાલુકા વહીવટી તંત્ર દ્વારા ધારી તાલુકા પંચાયત કચેરી ખાતે "સઘન સફાઈ ઝુંબેશ" અંતર્ગત એક વિશેષ સફાઈ કાર્યક્રમનું આયોજન કરવામાં આવ્યું હતું. આ કાર્યક્રમમાં સ્થાનિક ધારાસભ્ય જે.વી. કાકડીયાએ ખાસ ઉપસ્થિત રહીને ઉપસ્થિત સૌ લોકોને પ્રોત્સાહન પૂરું પાડ્યું હતું અને સફાઈ અભિયાનની કામગીરીને બિરદાવી હતી.

આ સફાઈ ઝુંબેશની સાથે-સાથે પર્યાવરણની જાળવણી માટે તાલુકા પંચાયત કચેરી ખાતે "એક પેડ માં કે નામ" અભિયાન અંતર્ગત વૃક્ષારોપણ કાર્યક્રમ પણ યોજવામાં આવ્યો હતો. આ પ્રસંગે કચેરી પરિસરમાં વિવિધ છોડ રોપીને પર્યાવરણ બચાવવાનો સંદેશ આપવામાં આવ્યો હતો.

આ કાર્યક્રમ દરમિયાન ધારી શહેરને સ્વચ્છ, સુંદર અને હરિયાળું બનાવવા માટેનો સંકલ્પ લેવામાં આવ્યો હતો. તંત્ર દ્વારા નાગરિકોને અપીલ કરવામાં આવી છે કે, આપણે સૌ સાથે મળીને આ સંકલ્પમાં જોડાઈએ, સ્વચ્છતા રાખીએ અને વધુમાં વધુ વૃક્ષો વાવીને આ લોક-અભિયાનને સફળ બનાવીએ.