અમદાવાદ શહેરમાં 'શસ્ત્ર છોડો, શાંતિ જોડો' અભિયાન હેઠળ 477 હથિયારો જમા: 800 હથિયારો કબજે

અમદાવાદ શહેર પોલીસ દ્વારા સમાજમાં શાંતિ અને સલામતી જાળવવાના ઉમદા હેતુથી 'શસ્ત્ર છોડો, શાંતિ જોડો' અભિયાન શરૂ કરવામાં આવ્યું છે. આ અભિયાનના ભાગરૂપે, લોકોને પોતાના કબજામાં રહેલા ગેરકાયદેસર હથિયારો પોલીસ સમક્ષ જમા કરાવવા માટે પ્રોત્સાહિત કરવામાં આવી રહ્યા છે. આ પહેલના પરિણામે, પશ્ચિમ અમદાવાદના 26 પોલીસ સ્ટેશન વિસ્તારમાંથી નાગરિકોએ સ્વેચ્છાએ મોટી સંખ્યામાં હથિયારો પોલીસને સુપરત કર્યા છે.

પોલીસના આંકડા મુજબ, ઝોન 1 માંથી 81, ઝોન 2 માંથી 85, ઝોન 3 માંથી 61 અને ઝોન 7 માંથી 238 હથિયારો જમા કરાવવામાં આવ્યા છે. આમ, કુલ ચાર ઝોનમાંથી મળીને 477 નાના-મોટા હથિયારો નાગરિકો દ્વારા સ્વેચ્છાએ પોલીસને સોંપવામાં આવ્યા છે. આ અભિયાનની શરૂઆતથી અત્યાર સુધીમાં અમદાવાદ શહેરમાંથી કુલ 800 જેટલા હથિયારો કબજે લેવામાં આવ્યા છે.

પોલીસ વિભાગ દ્વારા સ્પષ્ટ કરવામાં આવ્યું છે કે આ અભિયાન હજુ પણ ચાલુ રહેશે. જે નાગરિકો પાસે હથિયારો છે અને તેઓ તેને જમા કરાવવા ઈચ્છે છે, તેમને આ સુવર્ણ તકનો લાભ લેવા અપીલ કરવામાં આવી છે. પોલીસનું કહેવું છે કે ભવિષ્યમાં, જો પોલીસ દ્વારા કોમ્બિંગ ઓપરેશન દરમિયાન કોઈ પણ વ્યક્તિ પાસેથી ગેરકાયદેસર હથિયાર મળી આવશે, તો તેની સામે કડક કાયદેસરની કાર્યવાહી કરવામાં આવશે.