સુરતની અદાલતે પત્નીને બાકી નીકળતી ભરણપોષણની રકમ ન ચૂકવવાના મામલે કડક વલણ અપનાવીને પતિ વિરુદ્ધ આકરો આદેશ કર્યો છે. અદાલતે પતિને કુલ 360 દિવસન

સુરતની અદાલતે પત્નીને બાકી નીકળતી ભરણપોષણની રકમ ન ચૂકવવાના મામલે કડક વલણ અપનાવીને પતિ વિરુદ્ધ આકરો આદેશ કર્યો છે. અદાલતે પતિને કુલ 360 દિવસની સાદી કેદની સજા ફટકારી છે. કોર્ટે સ્પષ્ટ કર્યું કે ભરણપોષણના આદેશ છતાં નાણાં ચૂકવવામાં નિષ્ફળ રહેવું એ કાયદાકીય આદેશોનું સીધું ઉલ્લંઘન છે.

43 માસથી રૂ. 4,08,500 ચૂકવવામાં પતિની આનાકાની કેસની વિગત મુજબ, અરજદાર પત્ની શિરીને (નામ બદલ્યું છે) પોતાના પતિ શાહિદ (નામ બદલ્યું છે) વિરુદ્ધ અગાઉ ઘરેલુ હિંસા અધિનિયમ હેઠળ અરજી દાખલ કરી હતી. કોર્ટે માસિક ભરણપોષણ તેમજ મકાન ભાડાની રકમ ચૂકવવાનો આદેશ આપ્યો હોવા છતાં, પતિ શાહિદે છેલ્લા 43 માસનું મળીને કુલ ₹4,08,500/- જેટલું ભરણપોષણ ચૂકવ્યું ન હતું. આ બાકી રકમની વસૂલાત અર્થે અરજી દાખલ કરાતાં પતિને કોર્ટ સમક્ષ રજૂ કરવામાં આવ્યો હતો.

ઈરાદાપૂર્વકની બેદરકારી ગણી 12 માસની કસૂર બદલ સજા કોર્ટ સમક્ષ રજૂ કરાયેલા પતિએ બાકી રકમ ચૂકવવામાં પોતાની અસમર્થતા દર્શાવી હતી. જોકે, ચીફ જ્યુડિશિયલ મેજિસ્ટ્રેટે સીઆરપીસીની કલમ 125(3) હેઠળ સુનાવણી હાથ ધરી નોંધ્યું હતું કે કોર્ટના હુકમનું પાલન ન કરવું એ સ્પષ્ટપણે ઈરાદાપૂર્વકની બેદરકારી છે. આથી કોર્ટે 12 માસના ભરણપોષણની કસૂર બદલ પ્રત્યેક માસના 30 દિવસ લેખે પતિને કુલ 360 દિવસની સાદી કેદની સજા સંભળાવી હતી.