વડોદરામાં 108 ઇમરજન્સી સેવા દ્વારા ભારે વરસાદમાં 730 દર્દીઓને તાત્કાલિક સારવાર

વડોદરા જિલ્લામાં વરસી રહેલા ભારે વરસાદ અને પ્રતિકૂળ હવામાન વચ્ચે આરોગ્ય વિભાગની 108 ઇમરજન્સી એમ્બ્યુલન્સ સેવા દ્વારા પ્રશંસનીય કામગીરી કરવામાં આવી છે. છેલ્લા 3 દિવસ દરમિયાન, 108ની ટીમે સતત કાર્યરત રહીને કુલ 730થી વધુ ઇમરજન્સી કેસો સફળતાપૂર્વક હાથ ધર્યા છે.

આ ઇમરજન્સી કેસોમાં 131 કેસ સગર્ભા મહિલાઓને લગતા હતા, 84 માર્ગ અકસ્માતના, 60 શ્વાસ લેવામાં તકલીફના, 55 હૃદયરોગ સંબંધિત અને અન્ય મેડિકલ ઇમરજન્સી કેસોનો સમાવેશ થાય છે. 108ની ટીમે આ તમામ કેસોમાં સમયસર પહોંચી દર્દીઓને તાત્કાલિક સારવાર પૂરી પાડવામાં સફળતા મેળવી.

આ સ્થિતિમાં, 108 ઇમરજન્સી સેવા દ્વારા કરવામાં આવેલી કામગીરીને સ્થાનિક સમુદાયમાં ખૂબ જ પ્રશંસા મળી રહી છે. ભારે વરસાદના કારણે સર્જાયેલા આકસ્મિક પરિસ્થિતિઓમાં, આરોગ્ય વિભાગની આ સેવા લોકો માટે આશા અને સહારો બની છે.