નર્મદા જિલ્લામાં જનજાતીય ગૌરવ સપ્તાહ અંતર્ગત સ્વચ્છતા અભિયાન યોજાયું

નર્મદા જિલ્લામાં ધરતી આબા ભગવાન બિરસા મુંડાજીની ૧૫૧મી જન્મજયંતિ નિમિત્તે જનજાતીય ગૌરવ દિવસ-૨૦૨૬ અંતર્ગત તા. ૧૧થી ૧૮ નવેમ્બર દરમિયાન જનજાતીય ગૌરવ સપ્તાહની ઉજવણી કરવામાં આવી રહી છે. જેના ભાગરૂપે નાંદોદ તાલુકામાં સ્વચ્છતા અભિયાન યોજાયું હતું.
આ અભિયાનમાં ધારાસભ્ય ડો. દર્શનાબેન દેશમુખ સહિતના મહાનુભાવોએ રાજપીપળા ખાતે મહાત્મા ગાંધીજી, ભીલરાજા, ડો. બાબાસાહેબ આંબેડકર અને સરદાર વલ્લભભાઈ પટેલની પ્રતિમાઓની સાફ-સફાઈ કરી પુષ્પહાર અર્પણ કરી શ્રદ્ધાંજલિ પાઠવી હતી.
આ પ્રસંગે ધારાસભ્યએ જણાવ્યું હતું કે, દેશની આઝાદીમાં અમૂલ્ય યોગદાન આપનારા મહાનુભાવોને સન્માન આપવા અને સ્વચ્છતાનો સંદેશ જન-જન સુધી પહોંચાડવા આ અભિયાન યોજાયું છે.
અભિયાનમાં કાર્યકર્તાઓ, પદાધિકારીઓ, વહીવટી તંત્રના અધિકારીઓ-કર્મચારીઓ તેમજ સ્થાનિક નાગરિકો ઉત્સાહભેર જોડાયા હતા.