ସ୍ୱଚ୍ଛତାରେ ଦେଶରେ ଚମକିଲା ଓଡ଼ିଶା, ରାଜ୍ୟ ୧୦ ବିଦ୍ୟାଳୟ ଜାତୀୟ ସମ୍ମାନ

ଭୁବନେଶ୍ୱର: ସ୍ୱଚ୍ଛ ବିଦ୍ୟାଳୟ, ସୁସ୍ଥ ପରିବେଶ ଓ ଉନ୍ନତ ଶିକ୍ଷା ବ୍ୟବସ୍ଥା ଦିଗରେ ଓଡ଼ିଶାକୁ ମିଳିଛି ଆଉ ଏକ ବଡ଼ ସଫଳତା । ସ୍ୱଚ୍ଛ ବିଦ୍ୟାଳୟ ପୁରସ୍କାର (Swachh Vidyalaya Puraskar) ଏସଏଚଭିଆର୍ ୨୦୨୫-୨୬ରେ ରାଜ୍ୟର ୧୦ଟି ବିଦ୍ୟାଳୟ ଜାତୀୟ ସ୍ତରରେ Certificate of Merit ବା ଯୋଗ୍ୟତା ପ୍ରମାଣ ପତ୍ର ପାଇଁ ମନୋନୀତ ହୋଇଛନ୍ତି । ବିଦ୍ୟାଳୟରେ ସ୍ୱଚ୍ଛତା, ପରିମଳ ଓ ପରିବେଶ ସୁରକ୍ଷା କ୍ଷେତ୍ରରେ ଉତ୍କୃଷ୍ଟ ପ୍ରଦର୍ଶନ ପାଇଁ ଏହି ସମ୍ମାନ ମିଳିଛି । ଆସନ୍ତା ନଭେମ୍ବର ୧୭ ତାରିଖ ଅପରାହ୍ନ ୪ଟାରେ ନୂଆଦିଲ୍ଲୀସ୍ଥିତ ଆଇସିଏଆର୍ ପରିସରରେ ଜାତୀୟ ପୁରସ୍କାର ସମାରୋହ ଅନୁଷ୍ଠିତ ହେବ ।
ପୁରସ୍କୃତ ବିଦ୍ୟାଳୟଗୁଡ଼ିକୁ ଜାତୀୟ ସ୍ତରୀୟ ଯୋଗ୍ୟତା ପ୍ରମାଣପତ୍ର ସହ ଏସଏଚଭିଆର୍ କାର୍ଯ୍ୟକ୍ରମକୁ ଆଗକୁ ବଢ଼ାଇବା ପାଇଁ ଅତିରିକ୍ତ ୧ ଲକ୍ଷ ଟଙ୍କା ମିଳିବ । ଏଥିସହ ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକଙ୍କୁ ଶିକ୍ଷାମୂଳକ ପରିଦର୍ଶନ (Educational Exposure Visit) ର ସୁଯୋଗ ମଧ୍ୟ ମିଳିବ । ଓଡ଼ିଶାର ଗଜପତି, ଜଗତସିଂହପୁର, କନ୍ଧମାଳ, କେନ୍ଦୁଝର, କେନ୍ଦ୍ରାପଡ଼ା, ଖୋର୍ଦ୍ଧା, ମୟୂରଭଞ୍ଜ, ନୟାଗଡ଼, ସମ୍ବଲପୁର ଓ ସୋନପୁର ଜିଲ୍ଲାରୁ ଗୋଟିଏ ଲେଖାଏଁ ବିଦ୍ୟାଳୟ ଏହି ଜାତୀୟ ସମ୍ମାନ ପାଇଁ ମନୋନୀତ ହୋଇଛନ୍ତି । ଏ ନେଇ ଓଡ଼ିଶା ସ୍କୁଲ ଏଜୁକେସନ ପ୍ରୋଗ୍ରାମ ଅଥରିଟି (OSEPA) ପକ୍ଷରୁ ଚିଠି ଜାରି କରାଯାଇଛି ।
ଆସନ୍ତା ନଭେମ୍ବର ୧୭ ତାରିଖ ଅପରାହ୍ନ ୪ଟାରେ ନୂଆଦିଲ୍ଲୀସ୍ଥିତ ଆଇସିଏଆର୍ ପରିସରରେ ଜାତୀୟ ପୁରସ୍କାର ସମାରୋହ ଅନୁଷ୍ଠିତ ହେବ । ଏନସିଇଆରଟି ପକ୍ଷରୁ ଶିକ୍ଷା ମନ୍ତ୍ରଣାଳୟ, ୟୁନିସେଫ୍ (UNICEF) ଓ ଏନଆଇସି (NIC)ର ସହଯୋଗରେ ଏହି ସମାରୋହ ଆୟୋଜନ କରାଯାଉଛି । ଏଥିରେ ଯୋଗଦେବାକୁ ଥିବା ପ୍ରତିନିଧିଙ୍କ ଯାତାୟାତ ଓ ଦୈନିକ ଭତ୍ତା (TA/DA) ଭାରତ ସରକାର ବହନ କରିବେ ।