સુરતથી સૌરાષ્ટ્ર સુધી: દિવાળીના મુસાફરો સામે ખાનગી બસ ભાડા પર રોષ

સુરત શહેરમાંથી દિવાળીના તહેવારોમાં સૌરાષ્ટ્ર સહિત રાજ્યભરના પોતાના વતનમાં જતા લાખો મુસાફરો પાસેથી ખાનગી લક્ઝરી બસ સંચાલકો દ્વારા વસૂલવામાં આવતા મનફાવે તેવા ભાડા સામે ભારે રોષ ફાટી નીકળ્યો છે.

આ ગંભીર મુદ્દે વરાછાના ધારાસભ્ય અને પૂર્વ મંત્રી કુમાર કાનાણીએ જાતે બસ સ્ટેન્ડ પરિસરમાં પહોંચીને પરિસ્થિતિની સમીક્ષા કરી હતી અને મીડિયા સમક્ષ તીખી પ્રતિક્રિયા આપી હતી.

તેમણે સ્પષ્ટપણે આક્રોશ ઠાલવતા જણાવ્યું હતું કે તહેવારોની મોસમમાં મુસાફરોની થતી બેફામ લૂંટ કોઈ પણ સંજોગોમાં ચલાવી શકાય નહીં અને આ મનમાની સામે હવે કડક નિયંત્રણ જરૂરી બન્યું છે.