માતાના મઢ પદયાત્રા માર્ગ પર ૨૫ ટીમો દ્વારા મહા સફાઈ અભિયાનનો પ્રારંભ

માતાના મઢ ખાતે નવરાત્રિ દરમિયાન પદયાત્રીઓ માટે ઉભા કરાયેલા સેવા કેમ્પો બાદ હવે વહીવટી તંત્ર દ્વારા મહા સફાઈ ઝુંબેશ હાથ ધરવામાં આવ્યો છે. આ ઝુંબેશનો ઉદ્દેશ્ય પદયાત્રા માર્ગને સ્વચ્છ રાખવાનો છે.

નખત્રાણા પ્રાંત અધિકારી શ્રી ઉત્કર્ષ ઉજ્જવલની સૂચના અને માર્ગદર્શન હેઠળ આ સફાઈ અભિયાન ચલાવવામાં આવી રહ્યું છે. જેમાં નખત્રાણા તાલુકામાં ૨૦ અને લખપત તાલુકામાં ૫ મળી કુલ ૨૫ ટીમો સફાઈ કામગીરીમાં જોડાઈ છે. આ ટીમો દેશલપરથી લીફરી સુધીના પદયાત્રા માર્ગ પર આવેલા સેવા કેમ્પો અને તેની આસપાસના વિસ્તારોમાં સફાઈ કરશે.

વહીવટી તંત્ર દ્વારા કેમ્પ સંચાલકોને કેમ્પ પૂર્ણ થયાના ૨૪ કલાકમાં સફાઈ કામગીરી પૂર્ણ કરવા માટે સૂચના આપવામાં આવી છે. સંબંધિત અધિકારીઓ રૂટ પ્રમાણે કામગીરીનું નિરીક્ષણ કરશે. આ અભિયાન અંતર્ગત સૌથી સ્વચ્છ પાંચ સેવા કેમ્પોને વહીવટી તંત્ર દ્વારા સન્માનિત પણ કરવામાં આવશે.