ધારી-ખાંભા રોડ પર ઈકો કાર અને બાઈક વચ્ચે અકસ્માત: બાઈકચાલક ગંભીર ઈજાગ્રસ્ત, સિવિલ હોસ્પિટલમાં સારવાર ચાલુ

ધારી પંથકમાં ધારી-ખાંભા રોડ પર ઈકો કાર અને બાઈક વચ્ચે અકસ્માત સર્જાતા થોડા સમય માટે અફરાતફરીનો માહોલ જોવા મળ્યો હતો. અકસ્માતમાં બાઈકચાલકને ઈજા પહોંચતા આસપાસના લોકો તાત્કાલિક ઘટનાસ્થળે દોડી આવ્યા હતા. સ્થાનિક સેવાભાવી યુવાનો પણ સ્થળ પર પહોંચી ઈજાગ્રસ્તને મદદ કરી હતી.

ત્યારબાદ સ્થાનિકોની મદદથી બાઈકચાલકને સારવાર માટે ધારી સિવિલ હોસ્પિટલ ખાતે ખસેડવામાં આવ્યો હતો. ઘટનાની જાણ થતાં ધારી પોલીસ પણ સ્થળ પર પહોંચી હતી અને અકસ્માત અંગે પ્રાથમિક તપાસ હાથ ધરી હતી.

ધારી-ખાંભા રોડ પર કોઈ કારણોસર ઈકો કાર અને બાઈક વચ્ચે અથડામણ થઈ હોવાનું જાણવા મળ્યું છે. અકસ્માત કયા સંજોગોમાં સર્જાયો અને તેની પાછળનું ચોક્કસ કારણ શું છે તે અંગે પોલીસ દ્વારા વધુ તપાસ કરવામાં આવી રહી છે.

હાલ ઈજાગ્રસ્ત બાઈકચાલકની ધારી સિવિલ હોસ્પિટલ ખાતે સારવાર ચાલી રહી છે. પોલીસ તપાસ પૂર્ણ થયા બાદ સમગ્ર ઘટનાની હકીકત સામે આવશે.