વાગરા: ખડખંડાલી નજીક કન્ટેનર ટ્રકનો અકસ્માત! સ્ટિયરિંગ પરનો કાબૂ ગુમાવતા ટ્રક રેલિંગ સાથે ધડાકાભેર અથડાઈ, મોટી દુર્ઘટના ટળી..

વાગરા તાલુકાના ખડખંડાલી નજીક કન્ટેનર લઈને જઈ રહેલા
એક ટ્રકને અચાનક અકસ્માત નડતા માર્ગ પર થોડા સમય માટે
અફરાતફરીનો માહોલ સર્જાયો હતો. પ્રાથમિક માહિતી મુજબ
કોઈ અગમ્ય કારણોસર ટ્રકના ચાલકે સ્ટિયરિંગ પરનો કાબૂ
ગુમાવ્યો હતો, જેના કારણે ટ્રક રોડની સાઈડમાં લગાવેલી સુરક્ષા
રેલિંગ સાથે જોરદાર અથડાઈ ગઈ હતી.

અકસ્માત એટલો જોરદાર હતો કે ટ્રકના આગળના ભાગે ભારે
નુકસાન થયું હતું. ઘટનાના પગલે આસપાસના લોકો દોડી
આવ્યા હતા અને થોડા સમય માટે વાહનવ્યવહાર પણ પ્રભાવિત
થયો હતો. અકસ્માતના કારણોની ચર્ચા વચ્ચે વાહનચાલકોમાં
પણ ચિંતા જોવા મળી હતી.

સદનસીબે આ ગંભીર અકસ્માતમાં કોઈ જાનહાની થઈ નથી
અને કોઈને ઈજા પહોંચી હોવાના અહેવાલ નથી. જોકે, આ
ઘટના ફરી એકવાર માર્ગ સુરક્ષા અને ભારે વાહનોની બેદરકારી
અંગે ગંભીર સવાલો ઉભા કરે છે. અકસ્માતનું ચોક્કસ કારણ
જાણવા સંબંધિત તંત્ર દ્વારા વધુ તપાસ હાથ ધરવામાં આવી
રહી છે.