અમરેલી આસ્થા હોસ્પિટલને માનવ અંગદાન માટે રાજ્યની મંજૂરી

રાજ્ય સરકારની ઓથોરાઈઝ કમિટીએ અમરેલીની જાણીતી આસ્થા હોસ્પિટલને માનવ અંગદાન (ઓર્ગન ડોનેશન) માટે 1994ના કાયદા અનુસાર અધિકૃતતા આપી છે. આ નિર્ણયથી હોસ્પિટલને હ્યુમન ઓર્ગન ડોનેશન એક્ટ હેઠળ કાર્ય કરવાની મંજૂરી મળી છે.

હોસ્પિટલમાં કામ કરતા અનુભવી ફિઝિશિયન ડૉ. અશોક પરમારે આ મંજૂરીને લઈને આનંદ અને ગૌરવની લાગણી વ્યક્ત કરી. તેમણે જણાવ્યું કે આધુનિક ટેકનોલોજી અને વૈજ્ઞાનિક પ્રગતિ સાથે આ સેવા માનવ જીવન બચાવવા માટે મહત્વપૂર્ણ સાબિત થશે.

ઓર્ગન ડોનેશન પ્રક્રિયામાં દાતાથી હોસ્પિટલ તરફથી કોઈપણ પ્રકારનો ચાર્જ લેવામાં નહીં આવે, જેથી જરૂરિયાતમંદ દર્દીઓ નિઃશુલ્ક રીતે લાભ મેળવી શકે.

સંવેદન ગૃપના પ્રમુખ વિપુલ ભટ્ટીને રાજ્ય સરકાર દ્વારા આય ડોનેશન અવેરનેસ અને બ્લડ ડોનેશન પ્રવૃત્તિ માટે સન્માનિત કરવામાં આવ્યા છે અને તેમને ઓર્ગન ડોનેશન અવેરનેસ માટે વિશેષ જવાબદારી સોંપવામાં આવી છે.

સંવેદન ગૃપ અને અમરેલી જિલ્લામાંની વિવિધ સામાજિક સંસ્થાઓ, સ્વયંસેવકો, ડૉક્ટર્સ અને હોસ્પિટલ્સ સાથે મળીને અંગદાન સંબંધિત જાગૃતિ ફેલાવવાના કાર્યક્રમો શરૂ કરશે, જેથી વધુ લોકો આ મહત્વપૂર્ણ સેવા વિશે જાણકારી મેળવી શકે.