રાજકોટ LCB ટીમ પર ૧.૨૦ લાખની વસૂલીનો આરોપ: વીડિયો વાયરલ થતાં પોલીસ બેડામાં ખળભળાટ

રાજકોટ શહેર પોલીસ બેડામાં ફરી એકવાર તોડપાણી અને ભ્રષ્ટાચારનો સનસનાટીભર્યો કિસ્સો સામે આવ્યો છે. રાજકોટ પોલીસ જોન-૨ LCB (લોકલ ક્રાઈમ બ્રાન્ચ) ટીમ પર એક નાગરિક દ્વારા વસૂલી અને તોડપાણીના અત્યંત શરમજનક અને ચોંકાવનારા આક્ષેપો કરતો વીડિયો સોશિયલ મીડિયા પર વાયરલ થયો છે, જેના કારણે ખાખીવર્દી સામે ગંભીર સવાલો ઊભા થયા છે.

વાયરલ વીડિયોમાં પીડિત નાગરિકે જણાવ્યું છે કે, તેની સામે દારૂ પીવાનો ગુનો નોંધાયો હતો. આ કેસની પતાવટ કરવા અથવા હળવી કલમો લગાવવાના બદલામાં જોન-૨ LCB ટીમ દ્વારા રૂ. ૩ લાખની માગણી કરવામાં આવી હતી. મોટી રકમ ન હોવાથી પીડિતે આજીજી કરી હતી, પરંતુ પોલીસ કર્મચારીઓએ તેની વાત સાંભળી નહોતી. આખરે, પીડિતે પોતાની પત્નીના સોના-ચાંદીના ઘરેણાં ગીરો મૂકીને રૂ. ૧,૨૦,૦૦૦ ની રકમ એકઠી કરી પોલીસ કર્મચારીઓને ચૂકવી દીધી હતી.

ચોંકાવનારી બાબત એ છે કે, રૂ. ૧.૨૦ લાખની રકમ મેળવી લીધા બાદ પણ LCB ટીમ સંતુષ્ટ થઈ નહોતી. વાયરલ વીડિયો અનુસાર, પોલીસ કર્મચારીઓ દ્વારા હજુ પણ બાકી નીકળતા ૨૦,૦૦૦ રૂપિયાની સતત ઉઘરાણી કરવામાં આવી રહી છે અને પીડિત નાગરિકને માનસિક ત્રાસ આપવામાં આવી રહ્યો છે. રક્ષક જ જ્યારે ભક્ષક બને ત્યારે સામાન્ય નાગરિક ન્યાય માટે ક્યાં જાય તેવો પ્રશ્ન ઊભો થયો છે.

આ સનસનાટીભર્યો વીડિયો વાયરલ થતાં જ રાજકોટ પોલીસ કમિશનર કચેરી સહિત તમામ વિભાગોમાં ભારે ચકચાર મચી ગઈ છે. લોકોમાં ભારે રોષ જોવા મળી રહ્યો છે અને તાત્કાલિક ધોરણે નિષ્પક્ષ તપાસની માગણી કરવામાં આવી રહી છે. તોડપાણીમાં સંડોવાયેલા LCB અને ક્રાઈમ બ્રાન્ચના તમામ કર્મચારીઓ સામે ગુનો નોંધી તેમને તાત્કાલિક સસ્પેન્ડ કરવાની અને ગરીબ નાગરિક પાસે બળજબરીથી પડાવેલી રકમ પાછી અપાવવાની માંગણી કરવામાં આવી રહી છે. હવે જોવાનું એ રહેશે કે ઉચ્ચ પોલીસ અધિકારીઓ આ મામલે કડક કાર્યવાહી કરે છે કે કેમ.