સુરત લાંચકાંડમાં ફરાર પત્રકાર મહંમદ ઇસ્માઇલ પઠાણ ACBના જાળમાં, કાયદેસરની કાર્યવાહી શરૂ

સુરતમાં ચર્ચિત લાંચકાંડ કેસમાં લાંબા સમયથી ફરાર રહેલા પત્રકાર મહંમદ ઇસ્માઇલ ઉર્ફે પરવાના જમીલખાન પઠાણની ગુજરાત ભ્રષ્ટાચાર વિરોધી શાખા (ACB)એ ધરપકડ કરી છે. સુરત ACBની ટીમે આરોપીને ઝડપી પાડી તેની સામે કાયદેસરની કાર્યવાહી શરૂ કરી છે. આ કેસ ફેબ્રુઆરી 2026માં સામે આવ્યો હતો, જ્યારે સુરત મહાનગરપાલિકાના કાર્યપાલક ઇજનેર વિપુલ ગણેશવાલા ₹4 લાખની લાંચ સ્વીકારતા રંગેહાથ ઝડપાયા હતા. તપાસ દરમિયાન ફરિયાદીના બાંધકામ સામે તોડફોડની કાર્યવાહી ન કરવા બદલ કુલ ₹15 લાખની લાંચની માંગણી કરવામાં આવી હોવાના આક્ષેપો સામે આવ્યા હતા. કેસમાં અન્ય સંડોવાયેલા વ્યક્તિઓની ભૂમિકા અંગે પણ ACB દ્વારા તપાસ કરવામાં આવી રહી છે. ફરાર આરોપીની ધરપકડ બાદ તપાસને વધુ વેગ મળ્યો છે અને કેસના અન્ય પાસાઓની પણ ઊંડાણપૂર્વક તપાસ હાથ ધરવામાં આવી રહી છે. ACBએ જણાવ્યું છે કે પુરાવાના આધારે આગળની કાયદાકીય કાર્યવાહી કરવામાં આવશે.