સુરતના લીંબાયતમાં બુટલેગર સંજય ઉર્ફે સંજુ દાઢીના અડ્ડા પર સ્ટેટ મોનિટરિંગ સેલનો દરોડો, 9 ઝડપાયા

સુરતના લીંબાયત વિસ્તારમાં કુખ્યાત બુટલેગર સંજય ઉર્ફે સંજુ દાઢીના અડ્ડા પર સ્ટેટ મોનિટરિંગ સેલ (SMC) દ્વારા મોટી કાર્યવાહી કરવામાં આવી છે. આ દરોડા દરમિયાન દેશી-વિદેશી દારૂનો જથ્થો ઝડપી પાડવામાં આવ્યો હતો અને કુલ 9 ઈસમોની અટકાયત કરવામાં આવી છે.

મળતી માહિતી અનુસાર, આ કાર્યવાહી દરમિયાન દારૂ સહિત કુલ અંદાજે રૂ. 3.46 લાખનો મુદ્દામાલ જપ્ત કરવામાં આવ્યો છે. આ ઉપરાંત, 8 મોબાઇલ ફોન, 4 વાહનો અને રોકડ રકમ પણ કબજે કરવામાં આવી છે, જે દારૂના વેપાર સાથે સંકળાયેલા હોવાનું મનાય છે.

આ મોટી કાર્યવાહી બાદ સ્થાનિક પોલીસની કામગીરી સામે પણ કેટલાક પ્રશ્નો ઊભા થયા છે. સ્થાનિક વિસ્તારમાં કથિત રીતે ચાલતી દારૂની પ્રવૃત્તિઓ અંગે સ્થાનિક પોલીસને જાણ હતી કે નહીં તે અંગે ચર્ચાઓ ચાલી રહી છે. જો જાણ હતી, તો અગાઉ આવી પ્રવૃત્તિઓ સામે શા માટે અસરકારક કાર્યવાહી કરવામાં આવી ન હતી તેવા સવાલો પણ ઉઠી રહ્યા છે.