અલવા પ્રાથમિક શાળામાં 80મા સ્વાતંત્ર્ય દિવસની ભવ્ય ઉજવણી

તિલકવાડા તાલુકાના અલવા ગામે 15મી ઓગસ્ટના રોજ 80મા સ્વાતંત્ર્ય દિવસની ઉત્સાહભેર ઉજવણી કરવામાં આવી હતી. અલવા પ્રાથમિક શાળા ખાતે યોજાયેલા આ કાર્યક્રમમાં ગામના સરપંચશ્રી, માજી તાલુકા પંચાયતના સદસ્યશ્રી, ગામના વડીલો, યુવાનો, મહિલાઓ, એસએમસીના સભ્યો સહિત મોટી સંખ્યામાં ગ્રામજનો ઉપસ્થિત રહ્યા હતા.

કાર્યક્રમ દરમિયાન રાષ્ટ્રધ્વજ ફરકાવી રાષ્ટ્રગાન સાથે સ્વાતંત્ર્ય દિવસની ઉજવણી કરવામાં આવી હતી. ઉપસ્થિત સૌએ દેશભક્તિની ભાવના સાથે રાષ્ટ્રધ્વજને સલામી આપી હતી. શાળાના શિક્ષકો, વિદ્યાર્થીઓ અને ગ્રામજનોની ઉત્સાહભરી હાજરીથી સમગ્ર કાર્યક્રમ દેશભક્તિના રંગે રંગાઈ ગયો હતો.

ગામના આગેવાનો અને ગ્રામજનોએ સ્વાતંત્ર્ય સેનાનીઓ તથા દેશ માટે બલિદાન આપનાર વીર જવાનોને શ્રદ્ધાંજલિ અર્પણ કરી દેશની એકતા અને અખંડિતતા જાળવવાનો સંકલ્પ વ્યક્ત કર્યો હતો. અલવા પ્રાથમિક શાળામાં યોજાયેલી આ ઉજવણીમાં ગ્રામજનોની મોટી સંખ્યામાં હાજરીથી સ્વાતંત્ર્ય દિવસનો કાર્યક્રમ યાદગાર બન્યો હતો.