અમદાવાદ એરપોર્ટ પર 66 લાખનું સોનું જપ્ત, મુસાફર ધરપકડમાં

9 ઓગસ્ટ 2026ના રોજ રાત્રે 1:50 વાગ્યે, સરદાર વલ્લભભાઈ પટેલ આંતરરાષ્ટ્રીય એરપોર્ટ પર કસ્ટમ્સ વિભાગની એર ઇન્ટેલિજન્સ યુનિટ (AIU)એ એક મહત્વપૂર્ણ કાર્યવાહી હાથ ધરી. આ કાર્યવાહી દરમિયાન, એક મુસાફરના ગુદામાર્ગમાંથી આશરે 66 લાખ રૂપિયાનું સોનું જપ્ત કરવામાં આવ્યું છે. આ કેસમાં આરોપીની ધરપકડ કરવામાં આવી છે અને વધુ તપાસ ચાલુ છે.

કસ્ટમ્સ અધિકારીઓના જણાવ્યા અનુસાર, રવિવારે કતાર એરવેઝની ફ્લાઇટ નંબર QR-534 દ્વારા જેદ્દાહથી દોહા થઈને અમદાવાદ આવેલા 24 વર્ષીય મુસાફર સરફરાઝ માલાને પેસેન્જર પ્રોફાઇલિંગના આધારે અટકાવવામાં આવ્યો હતો. તે ગોધરાનો રહેવાસી છે.

તલાશી દરમિયાન, તેના ગુદામાર્ગ (મળાશય)માંથી 467.09 ગ્રામ સોનાની પેસ્ટ મળી આવી. આ પેસ્ટને પ્રકિ્રયા કરીને 24 કેરેટના 422.83 ગ્રામના સોનાના બારમાં ફેરવવામાં આવ્યો, જેની બજાર કિંમત આશરે 65.69 લાખ રૂપિયાની છે.

કસ્ટમ્સ વિભાગે આ સોનું કસ્ટમ્સ એક્ટ, 1962ની જોગવાઈઓ હેઠળ જપ્ત કર્યું છે અને આરોપીની ધરપકડ કરવામાં આવી છે.