અમદાવાદ પશ્ચિમ રેલવેમાં ખોરાકની ગુણવત્તા તપાસમાં 15 કિચન પર કાર્યવાહી, 40 લાખ દંડ અને એક કિચન બંધ

પશ્ચિમ રેલવેના અમદાવાદ મંડળમાં મુસાફરોને શુદ્ધ, સ્વચ્છ અને ઉચ્ચ ગુણવત્તાયુક્ત ભોજન મળી રહે તે માટે 'ઝીરો ટોલરન્સ' નીતિ હેઠળ કાર્યવાહી શરૂ કરવામાં આવી છે. ડીઆરએમ દ્વારા તૈયાર કરાયેલી ખાસ 'રેલવે ફૂડ વિજિલન્સ ફોર્સ'એ અમદાવાદ સહિત વિવિધ વિસ્તારોમાં રેલવેને ખોરાક પૂરો પાડતા 15 બેઝ કિચન અને કેટરિંગ એકમો પર દરોડા પાડ્યા.

તપાસમાં વિવિધ બેઝ કિચનમાંથી મોટાપાયે એક્સપાયર થયેલી વસ્તુઓ, સડેલા બટેટા, વાસણ ધોવાના પાઉડરનો અભાવ અને માખીનો ઉપદ્વવ જોવા મળ્યો. સાથે સાથે સફાઈ અને સ્વચ્છતાના નિયમોની ગંભીર બેદરકારી પણ નોંધાઈ.

નિયમોનું ઉલ્લંઘન કરનારા દોષિત કેટરર્સને 40 લાખનો દંડ ફટકારાયો છે, જ્યારે અત્યંત ગંદકી ધરાવતા સરસપુરના એક બેઝ કિચનને સ્થળ પર જ સીલ કરીને બંધ કરાવાયું છે. આ પગલાઓ દ્વારા મુસાફરોને સુરક્ષિત અને સ્વચ્છ ભોજન સુનિશ્ચિત કરવાનો ઉદ્દેશ્ય છે.