અમદાવાદની 10થી વધુ સ્કૂલો અને નરેન્દ્ર મોદી સ્ટેડિયમને ધમકીભર્યા ઈ-મેઈલ, સુરક્ષા તંત્ર એલર્ટ

અમદાવાદમાં આજે સવારે સુરક્ષા તંત્ર એલર્ટ થઈ ગયું છે, કારણ કે શહેરની 10થી વધુ શાળાઓને ધમકીભર્યા ઈ-મેઈલ મળ્યા હોવાના અહેવાલ મળ્યા છે. આ ઘટનામાં ઝાયડસ સ્કૂલ, વેજલપુર સ્કૂલ, બોડકદેવ સ્કૂલ ફોર ચિલ્ડ્રન અને SGVP સહિતની વિવિધ શાળાઓને ધમકી મળી હોવાનું જણાવાયું છે.

આ ઘટના બાદ પોલીસ, BDDS, ફાયર વિભાગ અને સ્નિફર ડોગ ટીમો દ્વારા સંબંધિત સ્થળોએ સઘન તપાસ શરૂ કરવામાં આવી છે. સાવચેતીના ભાગરૂપે કેટલીક શાળાઓમાં વિદ્યાર્થીઓને વહેલા ઘરે મોકલવામાં આવ્યા છે અને તેમના વાલીઓને આ ઘટનાની જાણ કરવામાં આવી છે.

અહેવાલો મુજબ, નરેન્દ્ર મોદી સ્ટેડિયમને પણ આ ધમકીમાં નિશાન બનાવાયું હોવાનું જણાવાયું છે. ઉલ્લેખનીય છે કે મોકલવામાં આવેલા ઈ-મેઈલમાં દિલજીત દોસાંઝના કાર્યક્રમનો પણ ઉલ્લેખ કરવામાં આવ્યો હોવાનું બહાર આવ્યું છે.

હાલમાં સુરક્ષા એજન્સીઓ દ્વારા આ ઘટનાની તપાસ કરવામાં આવી રહી છે. તપાસમાં ઈ-મેઈલ કોણે મોકલ્યો હતો અને આ ધમકી પાછળનો હેતુ શું છે, તે સ્પષ્ટ કરવામાં આવશે.