અમદાવાદ: ગીતામંદિર ST સ્ટેશન માર્કેટમાંથી 7 લાખથી વધુનો ડુપ્લિકેટ મોબાઇલનો જથ્થો ઝડપાયો

અમદાવાદ શહેરના ગીતામંદિર ST બસ સ્ટેશન માર્કેટમાં મોટા પાયે ડુપ્લિકેટ મોબાઇલ ફોન અને એસેસરીઝનું વેચાણ થતું હોવાની માહિતીના આધારે LCB ઝોન-6ની ટીમે એક રેડ કરી હતી. આ રેડ દરમિયાન, પોલીસે 1034 નકલી મોબાઇલ ફોન, લેપટોપ અને અન્ય એસેસરીઝ કબજે કરી છે. આ મુદ્દામાલની કુલ કિંમત આશરે 7.07 લાખ રૂપિયા આંકવામાં આવી છે.

પ્રાપ્ત માહિતી અનુસાર, LCBની ટીમે જ્યારે આ ફોન અને એસેસરીઝની તપાસ કરી, ત્યારે તે જાણીતી બ્રાન્ડેડ કંપનીઓના અધિકૃત પ્રતિનિધિઓની મદદથી નકલી હોવાનું બહાર આવ્યું હતું. આ વેચાણકર્તાઓ દ્વારા ગ્રાહકોને છેતરીને ડુપ્લિકેટ માલ વેચવામાં આવતો હતો.

આ સમગ્ર મામલે કાગડાપીઠ પોલીસ સ્ટેશનમાં 14 વેપારીઓ સામે ગુનો નોંધી કાયદેસરની કાર્યવાહી હાથ ધરવામાં આવી છે. પોલીસે આ રેકેટમાં સામેલ અન્ય લોકોની શોધખોળ શરૂ કરી છે અને આ નકલી માલ ક્યાંથી આવે છે અને ક્યાં સપ્લાય થાય છે તે દિશામાં ઊંડાણપૂર્વક તપાસ હાથ ધરી છે.