અમદાવાદ SOG ક્રાઈમ બ્રાન્ચે પોસ્ટ મારફતે થતા કફ સિરપના મોટા નેટવર્કનો પર્દાફાશ કર્યો, 60 લાખથી વધુનો મુદ્દામાલ જપ્ત

અમદાવાદ SOG ક્રાઈમ બ્રાન્ચે કાળુપુર GPO ખાતે ચેકિંગ હાથ ધર્યું તે દરમિયાન પોસ્ટ મારફતે થતા કફ સિરપના સપ્લાયના મોટા નેટવર્કનો પર્દાફાશ કર્યો છે. આ કાર્યવાહીમાં પોલીસે મોટી માત્રામાં કફ સિરપ જપ્ત કરી છે અને એક ટ્રેડરની ધરપકડ કરી કાયદેસરની કાર્યવાહી હાથ ધરી છે.

પ્રાથમિક તપાસમાં એવી માહિતી સામે આવી છે કે આ કફ સિરપ મિઝોરમ, ત્રિપુરા અને અસમ જેવા રાજ્યોમાં મોકલવામાં આવતી હતી. આ સિરપમાં અલ્ટ્રાઝોલમ અને કોડીન જેવા પદાર્થો હોવાનું જાણવા મળ્યું છે, જેનો દુરુપયોગ થવાની શક્યતા રહે છે.

પોલીસે કુલ 5,050 બોટલ કફ સિરપ જપ્ત કરી છે, જેનું બજાર મૂલ્ય આશરે 60 લાખ રૂપિયાથી વધુ આંકવામાં આવ્યું છે. આ મામલે પોલીસે એક ટ્રેડરની ધરપકડ કરી NDPS એક્ટ હેઠળ ગુનો નોંધી વધુ તપાસ હાથ ધરી છે. અગાઉ મોકલાયેલા પાર્સલો અંગે પણ પોલીસ દ્વારા ઊંડાણપૂર્વક તપાસ શરૂ કરવામાં આવી છે.