સુરત ગ્રામ્ય SOG દ્વારા ગાંજાના રિટેલ વેચાણનો પર્દાફાશ, એક ઝડપાયો

સુરત જિલ્લાને નશામુક્ત બનાવવાના ઉમદા હેતુ સાથે રેન્જ આઈજી પ્રેમવીર સિંહ અને એસપી રાજેશ ગઢિયાના માર્ગદર્શન હેઠળ સુરત ગ્રામ્ય SOG (સ્પેશિયલ ઓપરેશન ગ્રૂપ) દ્વારા નશીલા પદાર્થો સામેનું અભિયાન વધુ તેજ કરવામાં આવ્યું છે.

આ ઝુંબેશના ભાગરૂપે, પીઆઈ એલ.ડી. ઓડેદરાની ટીમને બાતમી મળી હતી કે પલસાણા-સચિન હાઈવે પર આવેલી એક લોખંડની કેબિનમાંથી ગાંજાનું રિટેલ વેચાણ થઈ રહ્યું છે. બાતમીના આધારે પોલીસે તાત્કાલિક કાર્યવાહી કરી દરોડો પાડ્યો હતો અને ગાંજાના રિટેલ વેચાણનો પર્દાફાશ કર્યો હતો.

પોલીસે ઘટનાસ્થળેથી પશ્ચિમ બંગાળના મૂળ વતની શાંતનુ ઉર્ફે બંગાલી નામના ૩૯ વર્ષીય શખ્સને ઝડપી પાડ્યો હતો. પોલીસે તેની પાસેથી ગાંજો, એક મોબાઈલ ફોન અને રોકડ રકમ મળીને કુલ રૂ. 17,230 નો મુદ્દામાલ જપ્ત કર્યો છે. આ કાર્યવાહીથી નશાના વેપારમાં સંડોવાયેલા અન્ય લોકોમાં પણ ફફડાટ વ્યાપી ગયો છે.