અરવલ્લી SOG પોલીસે નવી શીણોલ પાસેથી કરોડો રૂપિયાના પોશડોડા ઝડપી પાડ્યા

અરવલ્લી જિલ્લા SOG પોલીસે બાતમીના આધારે ધનસુરા પોલીસ સ્ટેશન હદ વિસ્તારમાં નવી શીણોલ ગામની સીમમાં એક સ્કોર્પિયો વાહનમાંથી ૨૭૮.૭૭ કિલોગ્રામ પોશડોડા (કાળાં) જપ્ત કર્યા છે. આ પોશડોડાની અંદાજિત કિંમત ૪૧,૮૧,૫૫૦ રૂપિયા છે. પોલીસે વાહનનો ફિલ્મી ઢબે પીછો કરી આ કાર્યવાહી હાથ ધરી હતી.

પોલીસે વાહનમાંથી પોશડોડા ઉપરાંત એક મેગેઝીન, ૨ જીવતા કારતૂસ અને ૨ મોબાઇલ ફોન પણ કબજે લીધા છે. આ તમામ મુદ્દામાલની કુલ કિંમત આશરે ૫૦,૦૧,૫૫૦ રૂપિયા આંકવામાં આવી છે. આ રેડ દ્વારા પોલીસે માદક પદાર્થની હેરાફેરીના મોટા નેટવર્કનો પર્દાફાશ કર્યો છે.

SOG પોલીસે આ મામલે વધુ તપાસ હાથ ધરી છે અને આ માદક પદાર્થ કોણ લાવી રહ્યું હતું અને ક્યાં પહોંચાડવાનું હતું તે દિશામાં તપાસ કેન્દ્રિત કરી છે. આ સફળતાથી રાજ્યમાં ચાલી રહેલા નશીલા પદાર્થોની હેરાફેરી સામે પોલીસની સતર્કતા પુરવાર થઈ છે.