ભીમ આર્મી દ્વારા SC, ST, OBC સમાજના હક્કો માટે "સંપૂર્ણ ભાગીદારી આંદોલન"

ભીમ આર્મી દ્વારા "સંપૂર્ણ ભાગીદારી આંદોલન" હેઠળ સરકાર સમક્ષ અનુસૂચિત જાતિ (SC), અનુસૂચિત જનજાતિ (ST), અન્ય પછાત વર્ગ (OBC) અને લઘુમતી સમાજના ૨૨ જેટલી મુખ્ય માંગણીઓ રજૂ કરવામાં આવી છે. આ માંગણીઓમાં મુખ્યત્વે જ્યાં અનામત નથી ત્યાં પણ અનામત લાગુ કરવાની અને સરકારી કોન્ટ્રાક્ટમાં પણ અનામત જાહેર કરવાની બાબતનો સમાવેશ થાય છે, જેથી આ સમાજના લોકોને તેનો લાભ મળી શકે.

આંદોલનકારીઓએ જણાવ્યું છે કે લઘુમતી સમાજના વિદ્યાર્થીઓ માટે બંધ કરવામાં આવેલી શિષ્યવૃત્તિ યોજનાઓને તાત્કાલિક ધોરણે ફરીથી શરૂ કરવામાં આવે. આ ઉપરાંત, એટ્રોસિટી કેસના પીડિતોને મળતી વળતરની રકમમાં વધારો કરીને તેને ૩૦ લાખ રૂપિયા કરવામાં આવે તેવી પણ સરકાર સમક્ષ માંગણી કરવામાં આવી છે.

ભીમ આર્મી દ્વારા આ ૨૨ મુદ્દાઓને લઈને સરકાર પર દબાણ લાવવાનો પ્રયાસ કરવામાં આવી રહ્યો છે. આંદોલનનો ઉદ્દેશ્ય સમાજના વંચિત વર્ગોના અધિકારો અને હક્કોનું રક્ષણ કરવાનો અને તેમને સમાન તકો પૂરી પાડવાનો છે.