सचिन वाझेच्या जामिनाला ७ ऑक्टोबरपर्यंत स्थगिती; सुटकेला पुन्हा ब्रेक

मुंबई: पोलीस अधिकारी सचिन वाझेला सत्र न्यायालयाने मंजूर केलेल्या जामिनाला उच्च न्यायालयात आव्हान दिल्यानंतर मोठा धक्का बसला आहे. सुटकेच्या काही तास आधीच, मुख्य न्यायमूर्तींसमोरील सुनावणीत वाझेच्या जामिनाला ७ ऑक्टोबरपर्यंत स्थगिती देण्यात आली आहे. यामुळे गेल्या काही वर्षांपासून तुरुंगात असलेल्या वाझेचा मुक्काम आणखी वाढला आहे.

सत्र न्यायालयाने काही अटींसह वाझेला जामीन मंजूर केला होता. रिलीज मेमो ठाणे मध्यवर्ती कारागृहात पोहोचला होता आणि कागदोपत्री प्रक्रिया पूर्ण झाल्यानंतर दुपारपर्यंत त्याची सुटका होण्याची शक्यता होती. मात्र, राष्ट्रीय तपास यंत्रणेने (NIA) वाझेच्या जामिनाला विरोध करत उच्च न्यायालयात याचिका दाखल केली.

NIAचे वकील अनिल सिंग यांनी युक्तिवाद केला की, वाझेवर दहशतवाद आणि हत्येचे आरोप आहेत. अंबानी कुटुंबाच्या घराजवळ स्फोटके ठेवल्याप्रकरणी कुटुंबातील एका सदस्याचा जबाब नोंदवण्यात आला असून, वाझेविरोधात अनेक गुन्हे दाखल असल्याचेही त्यांनी न्यायालयाच्या निदर्शनास आणून दिले.

सुनावणीदरम्यान वाझेचे वकील उपस्थित नसल्याने, त्यांची बाजू ऐकून घेण्यासाठी न्यायालयाने जामिनाला ७ ऑक्टोबरपर्यंत स्थगिती दिली. यापूर्वी जामीन देताना वाझेला पाच जिल्ह्यांमध्ये प्रवेशबंदी घालण्यात आली होती. मात्र, या ताज्या न्यायालयीन आदेशामुळे त्याची सुटका पुन्हा लांबणीवर पडली आहे.