અમદાવાદ: નિકોલ-ઓઢવના વેપારીઓને ₹4.60 લાખની ચિલ્લર ઠગાઈ કરનાર ઝડપાયો

અમદાવાદના પૂર્વ વિસ્તારમાં આવેલ નિકોલ અને ઓઢવ વિસ્તારના નાના વેપારીઓને આકર્ષક વાતોમાં ફસાવીને તેમની સાથે લાખો રૂપિયાની છેતરપિંડી આચરનાર એક ઠગબાજ આખરે પોલીસના સકંજામાં આવી ગયો છે. આ ઠગ ખાસ કરીને છૂટા પૈસા અને નાણાંની અદલાબદલીના બહાને વેપારીઓને વિશ્વાસમાં લઈને છેતરપિંડી કરતો હતો.

રામોલ પોલીસ સ્ટેશનના સ્ટાફ દ્વારા સક્રિયતા દાખવીને આ કુખ્યાત શખ્સને વસ્ત્રાલ તનમન ચાર રસ્તા પાસેથી ઝડપી પાડવામાં આવ્યો છે. પ્રાથમિક માહિતી મુજબ, આ આરોપીએ નિકોલ અને ઓઢવ વિસ્તારના ૭ થી વધુ નાના વેપારીઓ સાથે અંદાજે ₹૪.૬૦ લાખની 'ચિલ્લર ઠગાઈ' આચરી હતી.

આરોપી વેપારીઓને વિશ્વાસમાં લઈને અવનવી કીમિયા દ્વારા છેતરપિંડી આચરતો હતો. તેની ધરપકડ બાદ પોલીસે ગુનાનો ભેદ ઉકેલી કાઢ્યો છે અને વધુ તપાસ હાથ ધરી છે. આ ઠગાઈના નેટવર્કમાં અન્ય કોઈ સામેલ છે કે કેમ તે દિશામાં પણ પોલીસ તપાસ કરી રહી છે.