અકોટી ગામમાં આજે ફરી એકવાર કદાવર દીપડો વન વિભાગ દ્વારા ગોઠવાયેલા પાંજરામાં પુરાયો

અકોટી ગામમાં આજે ફરી એકવાર કદાવર દીપડો વન વિભાગ દ્વારા ગોઠવાયેલા પાંજરામાં પુરાયો હતો.છેલ્લા કેટલાક દિવસોથી ગામમાં દીપડાની અવરજવર વધતા ગ્રામજનોમાં ભયનો માહોલ સર્જાયો હતો.આશરે 20 દિવસ પહેલા ગામમાં લગાવેલ સીસીટીવી કેમેરામાં દીપડો શેરીના કૂતરાનો શિકાર કરતો નજરે ચડ્યો હતો. ત્યારબાદ ગ્રામજનોની રજૂઆતને પગલે વન વિભાગે પાંજરુ ગોઠવ્યું હતું.જેમાં એક દીપડો પાંજરે પુરાયો હતો.પરંતુ છેલ્લા એક - બે દિવસથી ફરી દીપડાની અવરજવરના અહેવાલો મળતા વન વિભાગે બીજી વખત ગામના નાકે આવેલી આંબાની વાડી ખાતે પાંજરુ ગોઠવ્યું હતું. આ જ વાડીમાં મજૂર પરિવારો રહેતા હોવાથી તેમની સુરક્ષાને ધ્યાનમાં રાખીને વન વિભાગે સતત દેખરેખ રાખી હતી. લગભગ 10 દિવસ બાદ આજે સવારે એક કદાવર દીપડો પાંજરામાં પુરાતા ગ્રામજનો તેમજ મજૂર પરિવારોમાં રાહતની લાગણી ફેલાઈ હતી.વન વિભાગે દીપડાને સુરક્ષિત રીતે કબજે કરી આગળની કાર્યવાહી હાથ ધરી છે.