ମାଇକ୍ରୋସଫ୍ଟ ସର୍ଭର ଡାଉନ୍; ଆଉଟଲୁକ୍‌ରେ ବଡ଼ ଧରଣର ଅଚଳାବସ୍ଥା, ନା ଖୋଲୁଛି ମେଲ୍, ନା ଯାଉଛି ମେସେଜ୍, ୟୁଜର୍ ହନ୍ତସନ୍ତ

ପୁଣି ଠପ୍ ହେଲା ମାଇକ୍ରୋସଫ୍ଟ ସେବା। ଆଉଟଲୁକ୍ ଓ ମାଇକ୍ରୋସଫ୍ଟ ୩୬୫ ବ୍ୟବହାର କରୁଥିବା ୟୁଜର୍‌ମାନେ ଏବେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି। ଅନେକ ୟୁଜର୍ ନିଜ ଇମେଲ୍ ଆକାଉଣ୍ଟ ଖୋଲିପାରୁନଥିବା ବେଳେ ନୂଆ ମେଲ୍ ପଠାଇବା ଓ ଗ୍ରହଣ କରିବାରେ ମଧ୍ୟ ସମସ୍ୟା ଦେଖାଦେଇଛି। ଫଳରେ ବିଶ୍ୱର ଅନେକ କାର୍ଯ୍ୟାଳୟରେ କାମ ପ୍ରଭାବିତ ହୋଇଛି।
ମାଇକ୍ରୋସଫ୍ଟ ସର୍ଭରରେ ବୈଷୟିକ ତ୍ରୁଟି
ମାଇକ୍ରୋସଫ୍ଟ ପକ୍ଷରୁ ଏହି ସମସ୍ୟାକୁ ବୈଷୟିକ ତ୍ରୁଟି ବୋଲି କୁହାଯାଇଛି। ସର୍ଭରରେ ସମସ୍ୟା ଯୋଗୁଁ ବିଭିନ୍ନ ଅଞ୍ଚଳରେ କନେକ୍ଟିଭିଟି ପ୍ରଭାବିତ ହୋଇଛି। ଏହାର ସମାଧାନ ପାଇଁ କମ୍ପାନୀର ଟେକ୍ନିକାଲ୍ ଟିମ୍ କାମ କରୁଛି।
ମାଇକ୍ରୋସଫ୍ଟ ୩୬୫ ପକ୍ଷରୁ ଏକ୍ସରେ ଜାରି ବିବୃତ୍ତିରେ ମଧ୍ୟ ଇମେଲ୍ ସେବାରେ ଦେଖାଦେଇଥିବା ସମସ୍ୟା ସମ୍ପର୍କରେ ସୂଚନା ଦିଆଯାଇଛି। ଏହାର ପ୍ରଭାବରେ ବିଶ୍ୱର ଅନେକ କାର୍ଯ୍ୟାଳୟରେ ଦୈନନ୍ଦିନ କାମ ଧୀର ହୋଇଯାଇଛି।
୧ ଲକ୍ଷରୁ ଅଧିକ ଅଭିଯୋଗ
ଡାଉନଡିଟେକ୍ଟର ଅନୁଯାୟୀ, ଆଉଟଲୁକ୍ ସେବାରେ ସମସ୍ୟା ଆରମ୍ଭ ହେବା ପରେ ଅଳ୍ପ ସମୟ ମଧ୍ୟରେ ଅଭିଯୋଗ ସଂଖ୍ୟା ବଢ଼ିଥିଲା। ଆଉଟଲୁକ୍ ସମ୍ବନ୍ଧରେ ୧ ଲକ୍ଷରୁ ଅଧିକ ସମସ୍ୟାର ରିପୋର୍ଟ ଆସିଥିବା ବେଳେ ମାଇକ୍ରୋସଫ୍ଟ ୩୬୫ ବ୍ୟବହାରକାରୀ ମଧ୍ୟ ଅସୁବିଧା ଜଣାଇଛନ୍ତି।
କେବଳ ଆମେରିକା ନୁହେଁ, ବିଶ୍ୱବ୍ୟାପୀ ପ୍ରଭାବ
ପ୍ରଥମେ ଏହି ସମସ୍ୟା କେବଳ ଆମେରିକାରେ ସୀମିତ ଥିବା ଅନୁମାନ କରାଯାଉଥିଲା। କିନ୍ତୁ ପରବର୍ତ୍ତୀ ସମୟରେ ଏହାର ପ୍ରଭାବ ବିଶ୍ୱର ଅନ୍ୟ ଅଞ୍ଚଳକୁ ମଧ୍ୟ ବ୍ୟାପିଥିବା ଜଣାପଡ଼ିଥିଲା। ଏହାକୁ ନେଇ ଅନେକ ୟୁଜର୍ ଅସନ୍ତୋଷ ପ୍ରକାଶ କରିଛନ୍ତି।
୨୦୨୪ରେ ମଧ୍ୟ ଦେଖାଦେଇଥିଲା ବଡ଼ ସମସ୍ୟା
ମାଇକ୍ରୋସଫ୍ଟ ସେବାରେ ଏଭଳି ସମସ୍ୟା ପ୍ରଥମ ନୁହେଁ। ୨୦୨୪ ମସିହାରେ ମଧ୍ୟ ବିଶ୍ୱବ୍ୟାପୀ ମାଇକ୍ରୋସଫ୍ଟ ୱିଣ୍ଡୋଜ୍ ବ୍ୟବହାରକାରୀମାନେ ବଡ଼ ଧରଣର ବୈଷୟିକ ସମସ୍ୟାର ସାମ୍ନା କରିଥିଲେ। ଅନେକ କମ୍ପ୍ୟୁଟର ହଠାତ୍ ବନ୍ଦ ହୋଇଯିବା ସହ ରିଷ୍ଟାର୍ଟ ହେଉଥିଲା। ସେତେବେଳେ କ୍ରାଉଡ୍‌ଷ୍ଟ୍ରାଇକ୍‌ର ଏକ ଅପଡେଟ୍ ଯୋଗୁଁ ଏହି ସମସ୍ୟା ହୋଇଥିବା ଜଣାପଡ଼ିଥିଲା। ଏବେ ପୁଣି ମାଇକ୍ରୋସଫ୍ଟର ଇମେଲ୍ ସେବାରେ ବାଧା ସୃଷ୍ଟି ହେବା ପରେ କେବେ ସେବା ସ୍ୱାଭାବିକ ହେବ, ତାହାକୁ ଅପେକ୍ଷା କରିଛନ୍ତି ୟୁଜର୍‌।