ଆସାମରେ ଟ୍ରେନ୍ ଦୁର୍ଘଟଣା, ୬ଟି ବଗି ଲାଇନଚ୍ୟୁତ, ଉଦ୍ଧାରକାର୍ଯ୍ୟ ଜାରି

ବୁଧବାର ସକାଳେ ଆସାମରେ ଏକ ବଡ଼ ଟ୍ରେନ୍ ଦୁର୍ଘଟଣା ଘଟିଯାଇଛି । ମିଜୋରାମରୁ ପଶ୍ଚିମବଙ୍ଗ ଅଭିମୁଖେ ଯାଉଥିବା କୋଲକାତା-ସୈରାଙ୍ଗ ଏକ୍ସପ୍ରେସ ଗୌହ୍ୱାଟୀରୁ କିଛି ଦୂରରେ ଥିବା ଦିଗାରୁ ଅଞ୍ଚଳରେ ଦୁର୍ଘଟଣା ଗ୍ରସ୍ତ ହୋଇଛି । ଦୁର୍ଘଟଣା ସ୍ଥଳରେ ଉଦ୍ଧାରକାର୍ଯ୍ୟ ଜାରି ରହିଛି ।
ପୂର୍ବତଟ ସୀମା ରେଳ ବିଭାଗ ସିପିଆରଓଙ୍କ ସୂଚନା ମୁତାବକ, ବୁଧବାର ସକାଳ ୬ଟା ବାଜି ୫୪ ମିନିଟ୍ ସମୟରେ ଦିଗାରୁ ରେଳ ଷ୍ଟେସନ ନିକଟରେ ଅନ୍ୟ ଏକ ଟ୍ରେନକୁ ରାସ୍ତା ଦେବାକୁ କୋଲକାତା-ସୈରାଙ୍ଗ (୧୩୧୨୫) ଟ୍ରେନକୁ ଅଟକାଯାଉଥିଲା । ଏହି ସମୟରେ ଲୋକୋ ପାଇଲଟ୍ ଟ୍ରେନର ଗତିକୁ ନିୟନ୍ତ୍ରଣରେ ରଖି ପାରିନ ଥିଲେ । ଫଳରେ ଲୋକୋ ପାଇଲଟଙ୍କ ବଗି ସମେତ ୬ଟି ବଗି ଓଲଟି ପଡ଼ିଥିଲା ।
ଦୁର୍ଘଟଣା ପରେ ତୁରନ୍ତ ରେଳ ବିଭାଗ ପକ୍ଷରୁ ଉଦ୍ଧାର କାର୍ଯ୍ୟ କରାଯାଇଥିଲା । ଫସି ଥିବା ଯାତ୍ରୀମାନଙ୍କୁ ଉଦ୍ଧାର କରିବାକୁ ଚେଷ୍ଟା ଜାରି ରହିଛି । କେହି ମୃତାହତ ହୋଇଥିବା ନେଇ କୌଣସି ସୂଚନା ମିଳିନଥିବାବେଳେ ଅନେକ ଯାତ୍ରୀ ଆହତ ହୋଇଥିବା ଅନୁମାନ କରାଯାଉଛି ।
ସେହିପରି ଯାତ୍ରୀମାନଙ୍କୁ ଅନ୍ୟ ଏକ ଟ୍ରେନ୍ ସାହାଯ୍ୟରେ ସେମାନଙ୍କ ଗନ୍ତବ୍ୟ ସ୍ଥଳକୁ ପଠାଯିବାକୁ ଉଦ୍ୟମ ଆରମ୍ଭ ହୋଇଛି । ବିଭାଗୀୟ ଜେନେରାଲ ମ୍ୟାନେଜର୍ ଏବଂ ଅନ୍ୟ ପ୍ରମୁଖ ଅଧିକାରୀଗଣ ଘଟଣା ସ୍ଥଳରେ ପହଁଚି ଉଦ୍ଧାରକାର୍ଯ୍ୟ ତଦାରଖ କରିବା ସହିତ ଯାଞ୍ଚ କରୁଛନ୍ତି ।