ପ୍ରିୟାଙ୍କ ହାତ ଧରିବେ କ୍ରିକେଟର ରିଙ୍କୁ; ଡିସେମ୍ବର ୪ରେ ଲକ୍ଷ୍ନୌରେ ହେବ ରାଜକୀୟ ବିବାହ

ଲକ୍ଷ୍ନୌ: ଭାରତୀୟ କ୍ରିକେଟ୍‌ର ଷ୍ଟାର୍ ଖେଳାଳି ରିଙ୍କୁ ସିଂହଙ୍କ ଜୀବନରେ ଆସିବ ନୂଆ ଇନିଂସ୍‌। ସମାଜବାଦୀ ପାର୍ଟିର ସାଂସଦ ପ୍ରିୟା ସରୋଜଙ୍କ ହାତ ଧରି ବୈବାହିକ ଜୀବନ ଆରମ୍ଭ କରିବେ ରିଙ୍କୁ। ଡିସେମ୍ବର ୪ ତାରିଖରେ ଲକ୍ଷ୍ନୌରେ ହେବ ଏହି ହାଇପ୍ରୋଫାଇଲ୍ ବିବାହ। ଏହି ବାହାଘରକୁ ନେଇ କ୍ରିକେଟ୍ ଓ ରାଜନୈତିକ ମହଲରେ ଏବେଠାରୁ ଚର୍ଚ୍ଚା ଜୋର୍ ଧରିଛି।
ଅଲିଗଡ଼ରୁ ଯିବ ୫୦ରୁ ୬୦ ଜଣଙ୍କ ବରଯାତ୍ରୀ
ରିଙ୍କୁଙ୍କ ବରଯାତ୍ରୀ ଅଲିଗଡ଼ରୁ ଲକ୍ଷ୍ନୌ ଅଭିମୁଖେ ଯାତ୍ରା କରିବ। ଏଥିରେ ପରିବାର ସଦସ୍ୟଙ୍କ ସହ ତାଙ୍କର ଅତି ଘନିଷ୍ଠ ବନ୍ଧୁ ଓ ବିଶେଷ ଅତିଥି ସାମିଲ ହେବେ। ମୋଟ ୫୦ରୁ ୬୦ ଜଣଙ୍କ ନାମ ତାଲିକା ପ୍ରସ୍ତୁତ ହେଉଥିବା ଜଣାପଡ଼ିଛି।
ବିବାହରେ ଯୋଗଦେବେ ଶାହରୁଖ, କୋହଲି ଓ ରୋହିତ!
ଏହି ଷ୍ଟାର୍ ଯୋଡ଼ିଙ୍କ ବାହାଘରରେ କ୍ରିକେଟ୍, ସିନେମା ଓ ରାଜନୀତି ଜଗତର ବହୁ ନାମୀଦାମୀ ବ୍ୟକ୍ତି ଯୋଗଦେବା ନେଇ ଚର୍ଚ୍ଚା ହେଉଛି। ଅତିଥି ତାଲିକାରେ ଶାହରୁଖ ଖାନ୍, ସମାଜବାଦୀ ପାର୍ଟି ମୁଖ୍ୟ ଅଖିଳେଶ ଯାଦବ, ଟିମ୍ ଇଣ୍ଡିଆର କୋଚ୍ ଗୌତମ ଗମ୍ଭୀର, ବିରାଟ କୋହଲି, ରୋହିତ ଶର୍ମା ଓ ବିସିସିଆଇ ଉପସଭାପତି ରାଜୀବ ଶୁକ୍ଳାଙ୍କ ନାମ ଚର୍ଚ୍ଚାରେ ରହିଛି।
ଭାବି ବୋହୂଙ୍କ ପାଇଁ ଶାଶୂ କିଣିଲେ ହଳଦିଆ ଶାଢ଼ି
ଘରେ ବାହାଘରର ମାହୋଲ୍ ଜମିଥିବା ବେଳେ ରିଙ୍କୁଙ୍କ ମାଆ ମଧ୍ୟ କିଣାକିଣିରେ ବ୍ୟସ୍ତ। ଭାବି ବୋହୂ ପ୍ରିୟା ସରୋଜଙ୍କ ପାଇଁ ସେ ଏକ ସୁନ୍ଦର ହଳଦିଆ ରଙ୍ଗର ଶାଢ଼ି କିଣିଛନ୍ତି। ଏହି ସମୟରେ ରିଙ୍କୁଙ୍କ ବଡ଼ ଭାଉଜ ଓ ଭଉଣୀ ନେହା ମଧ୍ୟ ତାଙ୍କ ସହ ଥିଲେ। ପରିବାରର ଛୋଟ ପିଲାମାନଙ୍କ ପାଇଁ ମଧ୍ୟ ପୋଷାକ କିଣାଯାଇଛି।
କେମିତି ଆରମ୍ଭ ହୋଇଥିଲା ପ୍ରେମ କାହାଣୀ?
ରିଙ୍କୁ ସିଂହ ଓ ପ୍ରିୟା ସରୋଜଙ୍କ ନିର୍ବନ୍ଧ ଜୁନ୍ ୨୦୨୫ରେ ଲକ୍ଷ୍ନୌର ସେଣ୍ଟ୍ରମ୍ ହୋଟେଲ୍‌ରେ ହୋଇଥିଲା। ତେବେ କ୍ରିକେଟ୍ କାର୍ଯ୍ୟସୂଚୀ ଓ ପାରିବାରିକ ପରିସ୍ଥିତି ଯୋଗୁଁ ବିବାହ ତାରିଖ ବାରମ୍ବାର ଘୁଞ୍ଚିଥିଲା। ୨୭ ଫେବୃଆରୀ ୨୦୨୬ରେ ରିଙ୍କୁଙ୍କ ବାପା ଖାନଚନ୍ଦଙ୍କ ଦେହାନ୍ତ ହେବା ପରେ ବିବାହ କାର୍ଯ୍ୟକ୍ରମ ଆହୁରି ବିଳମ୍ବିତ ହୋଇଥିଲା।
ଏବେ ଡିସେମ୍ବର ୪ରେ ଏହି ଷ୍ଟାର୍ ଯୋଡ଼ିଙ୍କ ବିବାହକୁ ନେଇ ଉଭୟ ପରିବାରରେ ଉତ୍ସାହ ଦେଖିବାକୁ ମିଳୁଛି। ରିଙ୍କୁଙ୍କ କ୍ରିକେଟ୍ ପଡ଼ିଆର ଛକା ଚଉକା ପରେ ଏବେ ଜୀବନର ନୂଆ ଇନିଂସ୍‌କୁ ନେଇ ଫ୍ୟାନ୍‌ମାନେ ମଧ୍ୟ ଉତ୍ସାହିତ।