અમરેલી યાર્ડમાં દિવાળી પહેલા કપાસની બમ્પર આવક, ખેડૂતોમાં ખુશીનો માહોલ

દિવાળીના તહેવારો નજીક આવતાની સાથે જ અમરેલી અને સાવરકુંડલા માર્કેટિંગ યાર્ડમાં કપાસની અધધ આવક નોંધાઈ છે. ખેડૂતો દિવાળી પહેલા રોકડ મેળવવા માટે પોતાના ખેતરમાંથી કપાસ લાવીને યાર્ડમાં વેચાણ માટે લાવી રહ્યા છે. જેના કારણે યાર્ડમાં કપાસના ઢગલા જોવા મળી રહ્યા છે.

સાવરકુંડલા APMC માં 12 હજાર મણ અને અમરેલી APMC માં 9 હજાર મણ કપાસની આવક નોંધાઈ છે. કપાસના ભાવ ₹1850 પ્રતિ મણ સુધી પહોંચતા ખેડૂતોમાં ખુશીનો માહોલ જોવા મળી રહ્યો છે. વેપારીઓના મતે, હાલ સારા ભાવ મળી રહ્યા છે.

જોકે, આ વર્ષે કમોસમી વરસાદને કારણે કપાસના ઉત્પાદનમાં ઘટાડો થતાં ખેડૂતોની ચિંતા યથાવત છે. નોંધનીય છે કે, ગુજરાતમાં 3 નવેમ્બરે બાબરા APMC માં રાજ્યનો સૌથી વધુ ભાવ ₹1930 પ્રતિ મણ બોલાયો હતો.