‘ଅର୍ଣ୍ଣବ’ ପ୍ରଭାବରେ ବଡ଼ ଭୂସ୍ଖଳ; ୧୩ ନିଖୋଜ ସୂଚନା

କନ୍ଧମାଳ-ଗଞ୍ଜାମ ସୀମାନ୍ତ ଗାଙ୍ଗୁବାଲି ପାହାଡ଼ରେ ବଡ଼ ଭୂସ୍ଖଳନ। ପାହାଡ଼ରୁ ଖସିଥିବା ପଥର ଓ ମାଟି ଅତଡ଼ାରେ ଧୋଇ ହୋଇଯାଇଛି ବାଇବେଲି ଏବଂ ଗିଡ଼ିପାବାଲି ଗାଁ। ଏହି ଦୁଇ ଗ୍ରାମର ୧୩ ଜଣ ଲୋକ ନିଖୋଜ ଥିବା ସୂଚନା ଆସିଛି।
ଉପରମୁଣ୍ଡରେ ପ୍ରବଳ ବର୍ଷା ଯୋଗୁ ପ୍ରାୟ ୩ କିମି ପର୍ଯ୍ୟନ୍ତ ପାହାଡ଼ ଧସିଯିବାରୁ ଏହି ପରିସ୍ଥିତି ଉପୁଜିଛି। କିଛି ଗ୍ରାମବାସୀ କିଲାପାଙ୍ଗା ଗ୍ରାମରେ ଥିବା ଆଶ୍ରୟ ସ୍ଥଳୀରେ ଆଶ୍ରୟ ନେଇଛନ୍ତି।
ଭୂସ୍ଖଳନ ଅଞ୍ଚଳରେ ଅଗ୍ନିଶମ ବାହିନୀ କର୍ମଚାରୀ ପହଞ୍ଚି ନିଖୋଜ ଗ୍ରାମବାସୀଙ୍କ ତାଲାସୀ ଆରମ୍ଭ କରିଛି । ବାଲିଗୁଡ଼ା ଉପଜିଲ୍ଲାପାଳ ଏବଂ ରାଇକିଆ ବିଡିଓ ମଧ୍ୟ ଭୂସ୍ଖଳନ ଅଞ୍ଚଳକୁ ଯାଇଥିବା ସୂଚନା ମିଳିଛି।
ଅନ୍ୟପକ୍ଷରେ ଭୂସ୍ଖଳନରେ କନ୍ଧମାଳ ଜିଲ୍ଲା ରାଇକିଆ ବ୍ଲକ ଡାଙ୍ଗେସି ଗାଁର ଏକ ଦମ୍ପତି ଓ ସେମାନଙ୍କ ଶିଶୁପୁତ୍ରର ମୃତ୍ୟୁ ଘଟିଛି। ମୃତକମାନେ ହେଉଛନ୍ତି, ଅଚ୍ୟୁତ ପ୍ରଧାନ (୩୦), ଅନୀଷା ପ୍ରଧାନ (୨୫) ଓ ସେମାନଙ୍କ ୯ ମାସର ପୁତ୍ର।