વિસાવદર ધારાસભ્ય ગોપાલ ઇટાલિયાએ સરકાર સમક્ષ કરી રજૂઆત: ઓછા વરસાદથી ખાલી પડેલા ડેમ-તળાવોમાંથી કાપ કાઢવા ખેડૂતોને આપો છૂટ

વિસાવદર: આ વર્ષે ઓછા વરસાદને કારણે રાજ્યના અનેક ડેમ, તળાવો અને ચેકડેમોમાં પાણીનો સંગ્રહ ઘટાડો થયો છે. આ પરિસ્થિતિને ધ્યાનમાં રાખીને, જળાશયોમાં વર્ષોથી એકત્રિત થયેલો કાપ (માટી) બહાર કાઢવાની કામગીરી ખેડૂતોને કરવાની છૂટ આપવામાં આવે તેવી રજૂઆત વિસાવદરના ધારાસભ્ય ગોપાલ ઇટાલિયા દ્વારા સરકાર સમક્ષ કરવામાં આવી છે.

ધારાસભ્ય ગોપાલ ઇટાલિયાની રજૂઆત મુજબ, જો ડેમ, તળાવો અને ચેકડેમોમાં એકત્રિત થયેલી માટીનો કાપ દૂર કરવામાં આવે, તો જળાશયોની પાણી સંગ્રહ કરવાની ક્ષમતામાં નોંધપાત્ર વધારો થઈ શકે છે. ઉપરાંત, બહાર કાઢવામાં આવેલી માટી ખેડૂતો પોતાના ખેતરોમાં નાખવા માટે ઉપયોગી કરી શકે છે, જેથી જમીનની ગુણવત્તા સુધારવામાં પણ મદદ મળી શકે છે.

આ વર્ષે ઓછા વરસાદને કારણે ખેતીના કામકાજ પર અસર પડી છે. આવી સંકટમુક્ત પરિસ્થિતિમાં, જો ખેડૂતોને જળાશયોમાંથી કાપ કાઢવાની છૂટ આપવામાં આવે, તો તેમને વધારાની રોજગારીની તક મળી શકે છે અને ખેતી માટે ઉપયોગી માટી પણ ઉપલબ્ધ થઈ શકે છે.

આમ, જળાશયોની સંગ્રહ ક્ષમતા વધારવી, ખેડૂતોની જમીન સુધારવી અને ખેડૂતોને કામ મળી રહે તેવા ત્રણેય હેતુઓને ધ્યાનમાં રાખીને આ રજૂઆત કરવામાં આવી છે. હવે સરકાર આ રજૂઆતને ધ્યાનમાં રાખીને ખેડૂતોના હિતમાં કેવો નિર્ણય લે છે અને કાપ કાઢવાની કામગીરી માટે કઈ નીતિ નક્કી કરે છે, તેના પર ખેડૂતોની નજર રહેશે.