સુરતના 'સૌથી સ્વચ્છ શહેર'ના તાજ પર ચિંતાના વાદળો, કુમાર કાનાણીએ મૂક્યો મોટો પ્રશ્ન

દેશભરમાં હાલ સ્વચ્છતા સર્વેક્ષણ યોજના હેઠળ સર્વેક્ષણ ચાલી રહ્યું છે. આ દરમિયાન, દેશના સૌથી સ્વચ્છ શહેર તરીકે નંબર વન પર બિરાજમાન સુરત માટે ગંભીર ચિંતાજનક સ્થિતિ ઊભી થઈ છે. શહેરમાં બેફામ રીતે વધી રહેલા હોટ ફિક્સ પ્લાસ્ટિક વેસ્ટના કારણે સુરત પોતાનો નંબર-1નો તાજ ગુમાવી શકે છે, એવો દાવો કરવામાં આવ્યો છે.

વરાછાના ધારાસભ્ય કુમાર કાનાણીએ મનપા તંત્ર સામે સનસનાટીભર્યો દાવો કરતાં જણાવ્યું છે કે, શહેરમાં પ્લાસ્ટિક કચરાનું પ્રમાણ ખૂબ જ વધી ગયું છે. આ સ્થિતિને કારણે સુરતના ગૌરવવંતા પ્રથમ સ્થાન સામે મોટો પ્રશ્નાર્થ ઊભો થયો છે.

સ્વચ્છતા સર્વેક્ષણ ચાલી રહ્યું હોવા છતાં, શહેરમાં ગંદકી અને ન્યુસન્સનું પ્રમાણ ચરમસીમાએ પહોંચી ગયું છે. આ પરિસ્થિતિને ધ્યાનમાં રાખતાં, સુરત શહેરનું સ્વચ્છતામાં પ્રથમ સ્થાન જોખમાઈ શકે છે, એવો અંદાજ ઊભો થયો છે.