ନାବାଳିକାଙ୍କୁ ଦୁଷ୍କର୍ମ ଓ ହତ୍ୟା ଘଟଣା: ଫାଣ୍ଡି ଏସ୍ଆଇଙ୍କ ବଦଳି

ଜଳେଶ୍ୱର: ବାଲେଶ୍ୱର ଜିଲ୍ଲା ଜଳେଶ୍ୱର ଥାନା ଅଞ୍ଚଳରେ ନାବାଳିକା ହତ୍ୟା ମାମଲାରେ ପୋଲିସ ବିଭାଗର ଚରମ ଅବେହଳା ସାମ୍ନାକୁ ଆସିଛି । ନାମ୍ପ ଫାଣ୍ଡି ସବ୍ ଇନସ୍ପେକ୍ଟର୍ କରଣ ମାରାଣ୍ଡିଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଏସ୍ଆଇ ମାରାଣ୍ଡିଙ୍କୁ ବାଲେଶ୍ୱର ଜିଲ୍ଲା ମୁଖ୍ୟାଳୟକୁ ବଦଳି କରାଯାଇଛି । ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ଏସପି କାର୍ଯ୍ୟାଳୟରେ ରହିବେ ।
ନାବାଳିକା ଜଣକ ଗତ ୫ ଦିନ ହେବ ନିଖୋଜ ଥିଲା । ଏ ନେଇ ପରିବାର ଲୋକେ ଫାଣ୍ଡିକୁ ଏତଲା ଦେବାକୁ ଯାଇଥିଲେ । ମାତ୍ର ପୋଲିସ ଏଫ୍ଆଇଆର୍ ଗ୍ରହଣ କରିନଥିବା ପରିବାର ଲୋକେ ଅଭିଯୋଗ କରିଛନ୍ତି । ସେପଟେ ଅଭିଯୁକ୍ତ କାହ୍ନୁ ଜେନା ଘରେ ସ୍ଥାନୀୟ ଲୋକେ ଭଙ୍ଗାରୁଜା କରିଛନ୍ତି ।
ଉଲ୍ଲେଖ ଯୋଗ୍ୟ, ଗତ ସପ୍ତାହକ ତଳେ, ଅକ୍ଟୋବର ୧୮ ତାରିଖ ଦିନ ନାବାଳିକା ଜଣକ ନାଚ ଶିଖିବାକୁ ଯାଇଥିଲେ । ତାଙ୍କର ଜଣେ ଝିଅ ସାଙ୍ଗଙ୍କ ଘରେ ରାତିରେ ରହିବେ ବୋଲି ସାଙ୍ଗ ଜଣକ ନାବାଳିକାଙ୍କ ଘରକୁ ଫୋନ୍ କରି ଜଣାଇଥିଲେ । କିନ୍ତୁ ସେଠାରୁ କାହ୍ନୁ ଜେନା ନାମକ ଜଣେ ଯୁବକ ନାବାଳିକାଙ୍କୁ ବାହାରକୁ ବୁଲିବାକୁ କହି ଡାକି ନେଇଥିଲେ । ଏହା ପରେ ନାବାଳିକା ଜଣକ ସକାଳେ ଆଉ ଘରକୁ ଫେରି ନ ଥିଲେ । ପରିବାର ଲୋକେ ନାମ୍ପୋ ଫାଣ୍ଡିରେ ଅଭିଯୋଗ କରିଥିଲେ । ପୋଲିସ କାହ୍ନୁ ଜେନାକୁ ଫାଣ୍ଡିକୁ ଆଣି ପଚରାଉଚରା କରି ଛାଡ଼ି ଦେଇଥିଲା ।
ଗତକାଲି ବର୍ତ୍ତନା ପଞ୍ଚାୟତ ରାସ୍ତା କଡ଼ ଜଙ୍ଗଲରୁ ନାବାଳିକାଙ୍କ ଦରପୋଡ଼ା ଗଳିତ ମୃତଦେହ ପୋଲିସ ପାଇଥିଲା । ଛାତ୍ରୀଙ୍କୁ ଗଣଦୁଷ୍କର୍ମ ପରେ ପୋଡ଼ି ଦିଆଯାଇଥିବା ଅନୁମାନ କରାଯାଉଛି । ପୋଲିସ ଅଭିଯୁକ୍ତ କାହ୍ନୁ ଜେନାକୁ ଗିରଫ କରିଥିବାବେଳେ ଅନ୍ୟମାନଙ୍କୁ ଧରିବାକୁ ତଦନ୍ତ ଜାରି ରଖିଛି ।