રાજુલા મોરંગીમાં વૃદ્ધની હત્યાનો આરોપી કલાકોમાં ઝડપાયો

અમરેલી, તા. ૧૮ : રાજુલા તાલુકાના મોરંગી ગામે અંગત અદાવતમાં વહેલી સવારે દાદાગીરી કરી વૃદ્ધની હત્યા કરનાર આરોપીને અમરેલી એલસીબી (LCB) અને ડુંગર પોલીસની ટીમે બાતમી તથા ટેકનિકલ સોર્સના આધારે ગણતરીની કલાકોમાં ઝડપી પાડ્યો છે.

મોરંગી ગામે દુકાન પાસે બેઠેલા ભીખુભાઈ નનુભાઈ સમા પર ગામના જ રૂસ્તમ રાજેભાઈ બેલીમ નામના શખ્સે જૂની અદાવતમાં ઉશ્કેરાઈને બોલાચાલી કરી છરી વડે હુમલો કર્યો હતો. ગંભીર ઈજાના કારણે ભીખુભાઈનું મોત નીપજ્યું હતું.

આ અંગે મૃતકના પુત્ર રમઝાનભાઈ સમા ની ફરિયાદના આધારે ગુનો નોંધાયો હતો. પોલીસે ત્વરિત કાર્યવાહી હાથ ધરી ૪૦ વર્ષીય આરોપી રૂસ્તમ બેલીમની અટકાયત કરી આગળની કાનૂની કાર્યવાહી શરૂ કરી છે.