માંગરોળ તાલુકામાં ટ્રક-બાઈક અકસ્માત: બે વિદ્યાર્થીઓ ઘાયલ

સુરત જિલ્લાના માંગરોળ તાલુકાના હરસણી ગામ નજીક એક ગંભીર માર્ગ અકસ્માત સર્જાયો છે. GIPCL કંપનીની વાલિયા માઇન્સમાંથી કોલસો ભરીને પસાર થઈ રહેલી એક ટ્રકે પુરપાટ ઝડપે આવી રહેલી બાઈકને જોરદાર ટક્કર મારી હતી.

આ અકસ્માતમાં બાઈક પર સવાર બે વિદ્યાર્થીઓને ગંભીર ઈજાઓ પહોંચી હતી. સ્થાનિક લોકો દ્વારા તાત્કાલિક ધોરણે ઈજાગ્રસ્ત વિદ્યાર્થીઓને નજીકની હોસ્પિટલમાં સારવાર માટે ખસેડવામાં આવ્યા હતા. અકસ્માતના પગલે ઘટનાસ્થળે લોકોના ટોળેટોળા એકત્ર થઈ ગયા હતા.

ઘટનાની જાણ થતાં પોલીસ પણ ઘટનાસ્થળે પહોંચી હતી અને પરિસ્થિતિનો તાગ મેળવ્યો હતો. પોલીસે ટ્રક ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી છે. આ અકસ્માતને કારણે હરસણી ગામ અને આસપાસના વિસ્તારમાં ચકચાર મચી જવા પામી છે.