વડોદરા: વોર્ડ ૧૫ ના કોર્પોરેટર આશિષભાઈ જોશી દ્વારા ભવ્ય ધાર્મિક સ્નેહ મિલન સમારોહનું આયોજન

વડોદરા મહાનગરપાલિકાના વોર્ડ નં. ૧૫ ના લોકપ્રિય કોર્પોરેટર શ્રી આશિષભાઈ જોશી દ્વારા આસો નવરાત્રિના પાવન પર્વની ઉજવણીના ભાગરૂપે એક ભવ્ય ધાર્મિક સ્નેહ મિલન સમારોહનું આયોજન કરવામાં આવ્યું હતું. નવરાત્રિના છઠ્ઠા નોરતે ઈષ્ટદેવ એકલિંગજી દાદાની કૃપા અને માં કાત્યાયની દેવીના આશીર્વાદ સાથે યોજાયેલા આ સમારોહમાં વોર્ડના તમામ મિત્રો, શુભેચ્છકો અને નગરજનોએ પરિવાર સાથે મોટી સંખ્યામાં ઉપસ્થિત રહી કાર્યક્રમની શોભા વધારી હતી.

આ સ્નેહ મિલન સમારોહમાં ગુજરાત પ્રદેશ કોંગ્રેસના પ્રમુખ શ્રી અમિતભાઈ ચાવડા મુખ્ય અતિથિ તરીકે ઉપસ્થિત રહ્યા હતા. તેમણે આ કાર્યક્રમને વિશેષ ગણાવી જણાવ્યું હતું કે, કોંગ્રેસ પાર્ટીની કોર્પોરેશનમાં સભ્યોની સંખ્યા ભલે ઓછી હોય, પરંતુ વડોદરાના કોઈપણ વોર્ડમાં કોઈ પણ સમસ્યા કે તકલીફ હોય તો તેઓ અને તેમની ટીમ નાગરિકોની સમસ્યાઓના નિરાકરણ માટે હંમેશા અગ્રેસર રહેશે. આ પ્રસંગે ગુજરાત સરકારના પૂર્વ મંત્રી શ્રી ભીખાભાઈ રબારી, શહેર કોંગ્રેસ અધ્યક્ષ શ્રી ઋત્વિજભાઈ, સિનિયર કોર્પોરેટર શ્રી ચંદ્રકાંતભાઈ ભથ્થુ, કોર્પોરેટર શ્રી તીર્થભાઈ, દીપાબેન શ્રીવાસ્તવ, શ્રી નરેન્દ્રભાઈ રાવત અને શહેર કોંગ્રેસના કાર્યકર્તાઓ પણ મોટી સંખ્યામાં ઉપસ્થિત રહ્યા હતા.

સંખેડા દશાલાડ ભુવન, વૃંદાવન ચાર રસ્તા, વાઘોડિયા રોડ, વડોદરા ખાતે યોજાયેલા આ કાર્યક્રમમાં ભોજન પ્રસાદ સાથે માતાજીના ભજનનો દિવ્ય આનંદ માણવામાં આવ્યો હતો, જેણે ભક્તિ અને સ્નેહનો અનોખો સંગમ સર્જ્યો હતો. કોર્પોરેટર શ્રી આશિષભાઈ જોશીના કાર્યકર્તાઓ દ્વારા આ કાર્યક્રમને સફળ બનાવવા માટે સઘન તૈયારીઓ કરવામાં આવી હતી અને નગરજનોનો ઉત્સાહભર્યો પ્રતિસાદ જોવા મળ્યો હતો.