સુરત ગ્રામ્ય પોલીસ દ્વારા વિદ્યાર્થીઓ માટે 'સુરક્ષા શક્તિ' અને 'વિદ્યાર્થી જાગૃતિ અભિયાન'નું આયોજન

સુરત ગ્રામ્ય પોલીસ હેડક્વાર્ટર ઘલુડી ખાતે સુરત ગ્રામ્ય પોલીસ અને જિલ્લા શિક્ષણાધિકારીના સંયુક્ત ઉપક્રમે 'સુરક્ષા શક્તિ' અને 'વિદ્યાર્થી જાગૃતિ અભિયાન'નું આયોજન કરવામાં આવ્યું હતું. આ કાર્યક્રમનો મુખ્ય ઉદ્દેશ્ય વિદ્યાર્થીઓને પોલીસની વિવિધ કામગીરીઓ અને સુરક્ષા સંબંધિત બાબતોથી માહિતગાર કરવાનો હતો. કામરેજ તાલુકાની શાળાઓના વિદ્યાર્થીઓ અને શિક્ષકોની મોટી સંખ્યામાં હાજરીમાં પોલીસે પોતાના વિવિધ યુનિટો દ્વારા પોતાની પ્રવૃત્તિઓનું પ્રદર્શન કર્યું હતું.

કાર્યક્રમ દરમિયાન, વિદ્યાર્થીઓને પોલીસની ચોક્કસ કામગીરીની ઝલક આપવા માટે ઘોડાઓની પરેડ અને સ્નિફર ડોગ્સના વિશેષ ડેમો રજૂ કરવામાં આવ્યા હતા. આ ઉપરાંત, નાનાથી લઈને આધુનિક હથિયારોનું પ્રદર્શન ગોઠવીને તેના ઉપયોગ અને મહત્ત્વ વિશે વિસ્તૃત સમજ આપવામાં આવી હતી.

પોલીસ ગુનેગારોને પકડવા અને ગુનાઓની તપાસ પ્રક્રિયામાં કઈ રીતે અદ્યતન ટેકનોલોજીનો ઉપયોગ કરે છે તે અંગેનું જીવંત નિદર્શન પણ વિદ્યાર્થીઓ સમક્ષ રજૂ કરવામાં આવ્યું હતું, જેણે તેમની જિજ્ઞાસાને સંતોષી હતી.