તલોદ પોલીસે નેગો. એક્ટમાં સજા પામેલા અને નાસતા ફરતા આરોપી રાજુસિંહ ઠાકોરને ઝડપી પાડ્યો

તલોદ પોલીસને નેગોશિયેબલ ઇન્સ્ટ્રુમેન્ટ એક્ટ (NI Act) હેઠળ સજા પામેલા અને નાસતા ફરતા આરોપીને ઝડપી પાડવામાં સફળતા મળી છે. જ્યુડિશિયલ મેજિસ્ટ્રેટ ફર્સ્ટ ક્લાસ, તલોદ કોર્ટમાં ચાલેલા ક્રિમિનલ કેસ નંબર 415/2025 માં આરોપી રાજુસિંહ દલપતસિંહ ઠાકોરને કલમ 138 હેઠળ 6 માસની સજા અને રૂ. 2,70,000/- (બે લાખ સિત્તેર હજાર રૂપિયા) સુધીનો દંડ ફટકારવામાં આવ્યો હતો.

સજા ફટકારવામાં આવ્યા બાદ આરોપી રાજુસિંહ દલપતસિંહ ઠાકોર, જે સીમલિયા, તા. તલોદ, જી. સાબરકાંઠાનો રહેવાસી છે, તે ફરાર થઈ ગયો હતો. તેની વિરુદ્ધ કોર્ટ દ્વારા સજા વોરંટ ઇસ્યુ કરવામાં આવ્યું હતું.

તલોદ પોલીસે સજા વોરંટના આધારે ચોક્કસ બાતમી મેળવીને કાર્યવાહી હાથ ધરી હતી. આ કાર્યવાહીના પગલે પોલીસે આરોપી રાજુસિંહ દલપતસિંહ ઠાકોરને સફળતાપૂર્વક ઝડપી પાડ્યો છે. પકડાયેલા આરોપીને કોર્ટમાં રજૂ કરવાની આગળની કાયદેસરની કાર્યવાહી હાથ ધરવામાં આવી રહી છે.