નારોલમાં ગટર માં પડી ગયેલી ૧૦ વર્ષની બાળકીના ૯૦ કલાક બાદ પણ નહીં મળતા પરિવાર દ્વારા પોલીસ ફરિયાદની માંગ

અમદાવાદના નારોલ વિસ્તારમાં એક ગંભીર ઘટના બની છે. નારોલ વિશાલ હાઇવે પર ગટર માં પડી ગયેલી ૧૦ વર્ષની બાળકીનો હજુ સુધી કોઈ પત્તો લાગ્યો નથી. ઘટનાને ૯૦ કલાક વીતી જવા છતાં બાળકીની ભાળ ન મળતાં પરિવારજનોમાં ભારે ચિંતા અને રોષ જોવા મળી રહ્યો છે.

પરિવારજનો દ્વારા આ મામલે તાત્કાલિક પગલાં ભરવાની માંગ કરવામાં આવી રહી છે. બાળકીના ગુમ થયા બાદ અનેક કલાકો વીતી ગયા હોવા છતાં કોઈ સંતોષકારક કાર્યવાહી ન થતાં, તેઓએ નારોલ પોલીસ સ્ટેશનમાં જવાબદાર અધિકારીઓ સામે પોલીસ ફરિયાદ નોંધવા માટે આવેદનપત્ર સુપરત કર્યું છે. આ આવેદનપત્ર દ્વારા તેઓએ બાળકીની સુરક્ષિત પરત લાવવા માટે તાત્કાલિક અને અસરકારક પગલાં ભરવાની અપીલ કરી છે.

આ ઘટનાએ સ્થાનિક પ્રશાસન અને સુરક્ષા વ્યવસ્થા પર પ્રશ્નાર્થ સર્જ્યો છે. નાગરિકો દ્વારા આવા ગંભીર બનાવોમાં જવાબદારી નક્કી કરવાની અને ભવિષ્યમાં આવી ઘટનાઓ ન બને તે માટે કડક પગલાં લેવાની માંગણી કરવામાં આવી રહી છે. પોલીસ દ્વારા આ મામલે વધુ તપાસ હાથ ધરવામાં આવી રહી છે.