અમદાવાદ: કાલુપુર પોલીસ સ્ટેશન વિસ્તારમાં નોકર ચોરીના ગુનામાં બે આરોપી આગ્રાથી ઝડપાયા, ૩.૩૨ લાખનો મુદ્દામાલ કબજે

અમદાવાદ શહેર પોલીસની લોકલ ક્રાઇમ બ્રાન્ચ ઝોન-૩ દ્વારા કાલુપુર પોલીસ સ્ટેશન વિસ્તારમાં થયેલ નોકર ચોરીના ગુનાનો સફળતાપૂર્વક ભેદ ઉકેલવામાં આવ્યો છે. "કે. માંગીલાલ પાર્સલ સર્વિસ" નામની પેઢીમાં થયેલ આ ચોરીના બનાવમાં પોલીસે બે આરોપીઓને આગ્રા, ઉત્તરપ્રદેશ ખાતેથી દબોચી લીધા છે.

પોલીસની પ્રાથમિક તપાસ મુજબ, આ બંને આરોપીઓ પેઢીમાં જ નોકરી કરતા હતા અને તેમણે જ આ ચોરીને અંજામ આપ્યો હતો. તેમની પાસેથી પોલીસે કુલ રૂ. ૩,૩૨,૦૦૦/- ની કિંમતનો ચોરીનો મુદ્દામાલ કબજે કર્યો છે. આ કાર્યવાહીથી કાલુપુર પોલીસ સ્ટેશનમાં નોંધાયેલ ચોરીના ગુનાનો ભેદ ઉકેલાયો છે.

આરોપીઓની ધરપકડ બાદ, પોલીસે વધુ તપાસ હાથ ધરી છે. આ ચોરીમાં અન્ય કોઈ સામેલ છે કે કેમ અને ચોરી કરેલ મુદ્દામાલ અંગે વધુ પૂછપરછ કરવામાં આવી રહી છે. પોલીસે આરોપીઓને કાયદેસરની કાર્યવાહી માટે કાલુપુર પોલીસ સ્ટેશનને સોંપવાની તજવીજ હાથ ધરી છે.