બનાસકાંઠા: અંબાજી મંદિરમાં ચોથા નોરતે મા અંબાના દર્શને હજારો શ્રદ્ધાળુઓ ઉમટ્યા

આસો નવરાત્રિના પવિત્ર તહેવાર દરમિયાન, આજે ચોથા નોરતે જગત જનની મા અંબાના દર્શને શ્રદ્ધાળુઓનું ઘોડાપૂર ઉમટી પડ્યું છે. બનાસકાંઠા જિલ્લામાં આવેલું પ્રસિદ્ધ શક્તિપીઠ અંબાજી મંદિર ભક્તોની ભારે ભીડથી ઉભરાઈ રહ્યું છે.

પ્રખ્યાત શક્તિપીઠ અંબાજી મંદિરમાં વહેલી સવારથી જ ભક્તોની ભારે ભીડ જોવા મળી રહી છે. નવરાત્રિના બીજા નોરતાથી લઈને આઠમ સુધી અંબાજી મંદિરમાં ખાસ પરંપરા મુજબ રોજ સવારે બે મંગળા આરતી યોજાય છે. આ પરંપરા મુજબ, આજે ચોથા નોરતે પણ મોટી સંખ્યામાં ભક્તોએ દર્શનનો લાભ લીધો.

આ બે મંગળા આરતીઓમાંથી એક આરતી ગર્ભગૃહમાં અને બીજી આરતી ઘટસ્થાપના પાસે મંદિરના ભટ્ટજી મહારાજ દ્વારા કરવામાં આવે છે. આ પવિત્ર ધાર્મિક વિધિઓમાં ભાગ લેવા અને મા અંબાના આશીર્વાદ મેળવવા માટે ભક્તો દૂર દૂરથી આવે છે.