કડી: નર્મદા કેનાલ પાસે કચરાના ઢગલામાં આગ, વાહનચાલકો અને સ્થાનિકો પરેશાન

કડી શહેરમાં નર્મદા કેનાલ નીચે કડી નગરપાલિકા દ્વારા ઠાલવવામાં આવતા કચરાના ઢગલામાં આગ લાગવાની ઘટના બની છે. આ આગના કારણે સમગ્ર વિસ્તારમાં ગાઢ ધુમાડો ફેલાઈ ગયો છે, જેના લીધે રોડ પરથી પસાર થતા લોકોને અને વાહનચાલકોને ભારે મુશ્કેલીનો સામનો કરવો પડી રહ્યો છે.

સ્થાનિક રહેવાસીઓના જણાવ્યા અનુસાર, છેલ્લા ઘણા સમયથી નર્મદા કેનાલની આસપાસ ગેરકાયદેસર રીતે કચરો ઠાલવવામાં આવી રહ્યો છે. કચરાના ઢગલામાં લાગેલી આગને કારણે કેનાલ રોડ પર વાહનચાલકો માટે દ્રશ્યતા (વિઝિબિલિટી) ખૂબ જ ઘટી ગઈ છે. રસ્તા પર ધુમાડાના સામ્રાજ્યને કારણે વાહનચાલકોને અકસ્માતનો ભય સતાવી રહ્યો છે. આ ઉપરાંત, લોકોને શ્વાસ લેવામાં તકલીફ અને આંખોમાં બળતરા જેવી સ્વાસ્થ્ય સંબંધી સમસ્યાઓ પણ ઊભી થઈ છે.

આ માર્ગ કડીથી કલ્યાણ પુરા સચાણાને જોડતો મુખ્ય રસ્તો હોવાથી દરરોજ સેંકડો લોકો આ માર્ગ પરથી પસાર થાય છે. સ્થાનિક રહીશો અને વાહનચાલકો દ્વારા તંત્ર સમક્ષ તાત્કાલિક ધોરણે આ આગ પર કાબૂ મેળવવા અને ભવિષ્યમાં આવા કચરાના ઢગલા ન થાય તે માટે કડક પગલાં ભરવાની માંગ કરવામાં આવી રહી છે.