ઓલપાડના કારેલી ગામમાં બે જૂથ વચ્ચે તીક્ષ્ણ હથિયારો સાથે મારામારી, વીડિયો વાયરલ

સુરત જિલ્લાના ઓલપાડ તાલુકાના કારેલી ગામમાં સાયણ સુગર રોડ પર બે જૂથો વચ્ચે તીક્ષ્ણ હથિયારો વડે મારામારીની ઘટના બની હતી. આ ઘટનાનો વીડિયો હાલ સોશિયલ મીડિયા પર ખૂબ જ ઝડપથી વાયરલ થઈ રહ્યો છે.

પ્રાપ્ત માહિતી અનુસાર, કારેલી ગામમાં સાયણ સુગર રોડ પર બે જૂથો વચ્ચે કોઈ બાબતે ઉગ્ર બોલાચાલી થઈ હતી. જે બાદ પરિસ્થિતિ વણસી હતી અને બંને જૂથોએ એકબીજા પર તીક્ષ્ણ હથિયારો વડે હુમલો કર્યો હતો. આ મારામારીમાં અનેક લોકો ઘાયલ થયા હોવાનું પ્રાથમિક અનુમાન છે.

આ સમગ્ર ઘટનાનો વીડિયો કોઈ સ્થાનિક વ્યક્તિ દ્વારા ઉતારવામાં આવ્યો હતો અને તે સોશિયલ મીડિયા પર શેર કરવામાં આવ્યો છે. વીડિયોમાં સ્પષ્ટપણે જોઈ શકાય છે કે લોકો લાકડીઓ અને અન્ય હથિયારો વડે એકબીજા પર હુમલો કરી રહ્યા છે. આ ઘટના બાદ સ્થાનિક પોલીસ દોડતી થઈ હતી અને વધુ તપાસ હાથ ધરી છે.