હારનાં બહાનાં નહીં, આત્મમંથન કરો: અમિત શાહે રાહુલ ગાંધીને વોટ ચોરીના આરોપો પર આપ્યો જડબાતોડ જવાબ

કેન્દ્રીય ગૃહમંત્રી અમિત શાહે કોંગ્રેસ નેતા રાહુલ ગાંધી દ્વારા ચૂંટણીમાં વોટ ચોરીના આરોપો પર વળતો પ્રહાર કર્યો છે. શાહે કહ્યું કે, હારનાં બહાનાં શોધવાનું બંધ કરો અને આત્મમંથન કરો. તેમણે રાહુલ ગાંધીના આરોપોને ફગાવી દેતા કહ્યું કે, કોંગ્રેસ પોતાની હાર માટે અન્ય પર દોષારોપણ કરવાને બદલે પોતાની નિષ્ફળતાઓનું વિશ્લેષણ કરવું જોઈએ.

અમિત શાહે અનેક રાજ્યોના ઉદાહરણ આપીને કોંગ્રેસની વર્તમાન સ્થિતિ પર પ્રકાશ પાડ્યો. તેમણે જણાવ્યું કે, તમિલનાડુમાં 1967થી, પશ્ચિમ બંગાળમાં 49 વર્ષથી, સિક્કિમમાં 42 વર્ષથી, ઉત્તર પ્રદેશમાં 37 વર્ષથી, બિહારમાં 36 વર્ષથી અને ગુજરાતમાં 30 વર્ષથી કોંગ્રેસનો કોઈ મુખ્યમંત્રી બન્યો નથી.

શાહે વધુમાં ઉમેર્યું કે, મહારાષ્ટ્રમાં 12 વર્ષ અને નાગાલેન્ડમાં 23 વર્ષથી કોંગ્રેસ સત્તાથી દૂર રહી છે. તેમણે પ્રશ્ન કર્યો કે, શું આ તમામ રાજ્યોમાં થયેલી હાર પણ વોટ ચોરીને કારણે જ થઈ હતી? આ પ્રશ્નો દ્વારા તેમણે કોંગ્રેસની સંગઠનાત્મક નબળાઈઓ અને જનતા સાથેના સંપર્ક તૂટવા પર ભાર મૂક્યો.