પ્રાંતિજ હાઈવે પર રખડતી ગાય ટ્રક આગડ આવતા ટ્રક પલટી, ડ્રાઈવરનો આબાદ બચાવ

સાબરકાંઠા જિલ્લાના પ્રાંતિજ હાઈવે પર એક ટ્રક અકસ્માતનો બનાવ બન્યો છે. પ્રાપ્ત માહિતી અનુસાર, હાઈવે પરથી પસાર થઈ રહેલી પ્લાસ્ટિકના કોથળા ભરેલી ટ્રક અચાનક રસ્તા પર આવી ગયેલી રખડતી ગાય સાથે અથડાતા ટ્રક ચાલકે કાબૂ ગુમાવ્યો હતો. જેના કારણે ટ્રક રોડ પર પલટી ખાઈ ગઈ હતી.

આ અકસ્માત બાદ સ્થાનિક લોકો અને પોલીસ ઘટનાસ્થળે દોડી આવ્યા હતા. સદનસીબે, આ ગમખ્વાર અકસ્માતમાં ટ્રક ચાલકને કોઈ ગંભીર ઈજા થઈ નથી અને તેનો આબાદ બચાવ થયો છે. અકસ્માતને કારણે હાઈવે પર થોડા સમય માટે વાહનવ્યવહાર ખોરવાયો હતો, પરંતુ બાદમાં ટ્રકને હટાવીને ટ્રાફિક પૂર્વવત કરવામાં આવ્યો હતો.

આ ઘટનાએ ફરી એકવાર રખડતા પશુઓનો પ્રશ્ન અને હાઈવે પર તેની સુરક્ષાને લઈને ચર્ચા જગાવી છે. આવા અકસ્માતોને રોકવા માટે તંત્ર દ્વારા યોગ્ય પગલાં લેવાની જરૂરિયાત પર ભાર મૂકવામાં આવી રહ્યો છે.