અમરેલી: કાઠમા ગામે તળાવમાં ડૂબી જવાથી પ્રૌઢનું મોત

અમરેલી જિલ્લાના કાઠમા ગામે એક દુઃખદ ઘટના બની છે, જેમાં વાય (આંચકી) આવવાને કારણે તળાવમાં પડી જવાથી એક પ્રૌઢનું મોત નીપજ્યું છે. આ બનાવ અંગે પોલીસમાં જાણ કરવામાં આવી છે.

પ્રાપ્ત માહિતી અનુસાર, મૃતક ઓઘવભાઈ નાથાભાઈ ઝાપડા (ઉંમર ૫૮ વર્ષ) કાઠમા ગામથી રાંઢિયા ગામ જવાના રસ્તે આવેલા ખોડિયાર માતાના મંદિર પાસે પોતાના માલ-ઢોર ચરાવી રહ્યા હતા. તે સમયે તેમને અચાનક વાય (આંચકી) આવતાં તેઓ નજીકના તળાવમાં પડી ગયા હતા.

તળાવના પાણીમાં ડૂબી જવાથી તેમનું ઘટનાસ્થળે જ મોત થયું હતું. આ બનાવ અંગે મેહુલભાઈ વીહાભાઈ ઝાપડા (ઉંમર ૩૪ વર્ષ) દ્વારા પોલીસમાં જાણ કરવામાં આવી છે.

આ બનાવ સંદર્ભે અમરેલી રૂરલ પોલીસ સ્ટેશનના એ.એસ.આઈ. વી. વી. ડાભી દ્વારા વધુ તપાસ હાથ ધરવામાં આવી રહી છે.