ତଣ୍ଟି ଉପରେ ଛିଡା ହୋଇ ସ୍ୱାମୀଙ୍କୁ ହତ୍ୟାକଲେ ସ୍ତ୍ରୀ, ପୁଅଝିଅ ସାମିଲ

ସ୍ୱାମୀ ମଦ୍ୟପାନ କରି ସ୍ତ୍ରୀ ଆଉ ପିଲାଛୁଆଙ୍କ ସହ ଝଗଡ଼ା କଲେ । ଶୋଇ ପଡ଼ିଥିବାବେଳେ ସ୍ୱାମୀଙ୍କ ତଣ୍ଟି ଉପରେ ଛିଡ଼ା ହୋଇଗଲେ ସ୍ତ୍ରୀ । ଏଭଳି ଏକ ହତ୍ୟାକାଣ୍ଡ ଘଟିଛି କେନ୍ଦ୍ରାପଡା ଜିଲ୍ଲା ଆଳି ଥାନା ଅନ୍ତର୍ଗତ ମାଳପାଟଣା ଗାଁରେ । ମୃତକଙ୍କ ନାମ ନିରଞ୍ଜନ ସାହୁ । ଅଭିଯୁକ୍ତ ତଥା ତାଙ୍କ ସ୍ତ୍ରୀଙ୍କର ନାମ ମନୋରମା ସାହୁ ।
ଗତକାଲି ବିଳମ୍ୱିତ ରାତିରେ ନିରଞ୍ଜନ ମଦ ପିଇ ଘରକୁ ଫେରିଥିଲେ। ଘରେ ପହଞ୍ଚିବା ପରେ ସ୍ତ୍ରୀ ଓ ପୁଅଝିଅଙ୍କ ସହ ଝଗଡା କରିଥିଲେ । ଏହାପରେ ନିରଞ୍ଜନ ଶୋଇପଡ଼ିଥିଲେ । ସେ ଶୋଇଥିବାବେଳେ ସ୍ତ୍ରୀ ମନୋରମା ତାଙ୍କ ତଣ୍ଟି ଉପରେ ଛିଡା ହୋଇ ତାଙ୍କୁ ହତ୍ୟା କରିଥିଲେ । ଏଥିରେ ମନୋରମାକୁ ସହଯୋଗ କରିଥିଲେ ତାଙ୍କ ପୁଅ ଓ ନାବାଳିକା ଝିଅ ।
ସକାଳେ ନିରଞ୍ଜନଙ୍କ ମୃତଦେହ ଘରବାହାରେ ପଡିଥିବାର ପଡୋଶୀ ଦେଖିବାକୁ ପାଇଥିଲେ । ଏନେଇ ଆଳି ପୁଲିସକୁ ଖବର ଦିଆଯାଇଥିଲା ।
ଖବର ପାଇ ପୁଲିସ ଘଟଣା ସ୍ଥଳରେ ସାଇଣ୍ଟିଫିକ ଟିମ୍ ପହଞ୍ଚିଥିଲା । ପୁଲିସ ଘଟଣାସ୍ଥଳ ଯାଞ୍ଚ କରିଛି । ଅଭିଯୁକ୍ତମାନଙ୍କୁ ଥାନାରେ ଅଟକ ରଖି ପଚରା ଉଚରା କରାଯାଉଛି । ଏହି ହତ୍ୟାକାଣ୍ଡରେ ତାଙ୍କ ସହ ପୁଅ ଓ ନାବାଳିକା ଝିଅ ସାମିଲ ଥିବା ମନୋରମା ପୁଲିସ ଆଗରେ ସ୍ୱୀକାର କରିଥିବା ଜଣାପଡ଼ିଛି ।
ପୁଲିସ ମନୋରମାକୁ ଥାନାକୁ ନେଇ ଅଟକ ରଖିବା ପୂର୍ବରୁ ଗଣମାଧ୍ୟମକୁ ସୂଚନା ଦେଇ ସେ କହିଥିଲେ, ଦୀର୍ଘ ୧୦ ବର୍ଷ ଧରି ସେ ମୋତେ ପିଟାମରା କରୁଥିଲେ । ସବୁଦିନ ମଦ ପିଇ ଆସି ମତେ ପିଟାମରା କରନ୍ତି । ମୁଁ ଏଥିରେ ଉତ୍ତ୍ୟକ୍ତ ହୋଇ ପୁଲିସକୁ ସବୁ କହିଥିଲି । ମୋ କଥା ଶୁଣି ପୁଲିସ ତାଙ୍କୁ ଗିରଫ କରିଥିଲା । ସେ ୩ ମାସ ଜେଲରେ ଥିଲେ । ସେ ଜେଲକୁ ଗଲା ପରେ ମୁଁ ଅନ୍ୟମାନଙ୍କର ଘରେ କାମ କରି ମୋ ପରିବାର ପ୍ରତିପୋଷଣ କରୁଥିଲି । ସକାଳ ୬ ଟାରୁ ରାତି ୮ ଟା ପର୍ଯ୍ୟନ୍ତ ମୁଁ ଘର ଚଳାଇବା ପାଇଁ ଖଟିକି ଆସେ । ୩ ମାସ ପରେ ସେ ଘରକୁ ପୁଣି ଘରକୁ ଫେରିଥିଲେ । ପୂର୍ବପରି ପୁଣି ମଦ ପିଇ ପିଟାମରା କରୁଥିଲେ । ଗତକାଲି ମୁଁ କାମ ସାରି ଆସିଲା ପରେ ସେ ଘରେ ବସି ମଦ ପିଉଥିଲେ । ହଠାତ ମଦ ନିଶାରେ ସେ ମତେ ବାଡେଇଲେ । ମୁଁ ଭାବିଲି ତାକୁ ମାରିଦେବି ଆଉ ଆଗକୁ ଯେତିକି ଦିନ ବଞ୍ଚିବି ଶାନ୍ତିରେ ବଞ୍ଚିବି । ଏହା ଭାବି ମୁଁ ତାଙ୍କ ବେକ ଉପରେ ଚଢ଼ିଗଲି ।